Ադրբեջանի հետ ունենք երկկողմ պրոցես, որն իմ կարծիքով արձանագրել է կոնկրետ արդյունքներ. չունենք էսկալացիաներ, ունենք սահմանազատված-սահմանագծված հատված և ունենք խաղաղության պայմանագրի բանակցությունների շրջանակում առաջ գնացող գործընթաց, ԱԺ-ում լրագրողների հետ զրույցում ասաց Էկոնոմիկայի նախարար Գևորգ Պապոյանը։
«Եթե ունենք դրական պրոցես, ինչու շեղվենք։ Տրամաբանությունը, որը կա, լավն է, և պետք է գնալ առաջ»,- ասաց նախարարը։
Անդրադառնալով Ռուսաստանի կողմից հայկական ապրանքների մուտքի արգելքին՝ Պապոյանը նկատեց, որ Հայաստանն ինքը ավելի շատ որակին չհամապատասխանող ապրանք է հետ ուղարկում։
«Մենք ինքներս ենք որակի պահանջ մեր առաջ դնում։ Եթե մի ապրանքի մեջ պարարտանյութը շատ է, այո՛, չպետք է գնա։ Դա մեր երկրի պատվի հարցն է»,- ասաց նախարարը։
Ճշգրտմանը՝ այսինքն՝ քաղաքական նկատառումներ այստեղ չկան, այլ խոսքը զուտ տեխնիկական չափորոշիչների մասին է, Գևորգ Պապոյանը պատասխանեց՝ քննարկումները դրան են տարել։
«Նախորդ անգամ էլ ասացի՝ ծիրան և ինքնիշխանություն բանաձևը չեմ պատրաստվում փոխանակել։ Ես չեմ պատրաստվում խնդրել որևէ երկրի ղեկավարության հայկական մեկ ֆուռ վատ ծիրանն ընդունել։ Չէ՛։ Դա տեղի է ունենում քո ինքնիշխանության հաշվին։ Այն, ինչն օրենքներից դուրս է, տեղի է ունենում քո ինքնիշխանության հաշվին։ ՀՀ այս կառավարությունը պատրաստ չէ մեր ինքնիշխանությունը զիջել լոլիկով կամ ծիրանով»,- ասաց Պապոյանը։
