Այդ զինվորները (նկատի ունի բանակում խաղաղ պայմաններում մահացած զինվորներին՝ խմբ.) որոշ ժամանակ առաջ մեր երիտասարդներն են եղել, մեր ուսանողները, մեր աշակերտները, մեր զավակները, և ինչն այս հասարակության մեջ կա՝ արատավոր երևույթները, դրանք տեղափոխվում են նաև բանակ, լրագրողների հետ ճեպազրույցում ասաց ՔՊ-ական պատգամավոր Արմեն Խաչատրյանը՝ անդրադառնալով բանակում խաղաղ պայմաններում զինծառայողների մահվան դեպքերի աճին։
«Մենք քաղաքացիական կյանքում ունենում ենք շատ ինքնասպանություններ, դժբախտ պատահարներ։ Չգիտեմ ինչու՝այդ մասին չեք խոսում։ Այդ նույն խտացված վիճակը երբեմն մտնում է նաև բանակ։ Բանակում ավելի խտացված արտահայտվում են այն խնդիրները, որոնք սոցիումի մեջ կան»,- ասաց նա։
Հարցին՝ իսկ ո՞վ է պատասխանատու նման դեպքերի համար, պատգամավորը պատասխանեց՝ բոլորս։
«Ոչ միայն ՊՆ-ն։ Պատասխանատու են և՛ ԿԳՄՍՆ-ն, և՛ ծնողները, և՛ մանկապարտեզները՝ այն վատ դրսևումների համար, որոնք քաղաքացին ունեցել է և դրանցով մտել է բանակ։ Հազարավորների մոտ դա անցնում է, դաստիարակվում են, բանակում դզվում է, բայց լինում է նաև, որ չի դզվում։ Էն, ինչը հասարակության մեջ կա, արտահայտվում է բանակում։
Իդեալական վիճակ կլինի, երբ խնդիր ունեցող զինապարտից բանակից հետո ստանանք շատ ավելի լավ քաղաքացի։ Բայց սրա համար ժամանակ, մեծ ռեսուրսներ ենք պետք»,- ասաց իշխանական պատգամավորը։
Հարցին՝ ինչո՞ւ մինչ այժմ հրաժարական չի տվել պաշտպանության նախարար Սուրեն Պապիկյանը կամ ՔՊ-ում առհասարակ քննարկվո՞ւմ է նրան պաշտոնանկ անելու հարցը, Խաչատրյանը պատասխանեց՝ եթե Պապիկյանը իր առջև դրված խնդիրները չլուծեր այնպես, ինչպես այս պահին պետք է կամ այնպես, ինչպես թիմը պատկերացնում է, նա այդ պաշտոնում այլևս չէր լինի։
«Իր՝ նախարար լինելը պայմանավորված չէ նրանով, որ ինքը Սուրեն Պապիկյանն է և քաղաքական թիմի անդամ է։ Կաշկանդված չենք, և եթե պետք է լինում շատերը պաշտոնանկ են արվում»,- ասաց Խաչատրյանը։
