Մեկ ամսվա մեջ բանակում երկրորդ զոհն ունենք, ավելի ճիշտ՝ սպանվածը, բայց ոչ թշնամու գնդակից։ Իսկ Պաշտպանության նախարար Սուրեն Պապիկյանը դեռ հրաժարական չի տվել։
Փաշինյանն իր կյանքի ու առօրյայի օրինակով ցույց է տալիս, որ «կյանքը շարունակվում է»։ ՔՊ ժողովրդավարության դպրոցում «Որտեղ հաց, այնտեղ կաց» խորագրով դասախոսություն կարդաց, մինչ այդ մասնակցեց Ապարանում տեղի ունեցած լեռնային հեծանվասպորտի մրցաշարին. տեսանյութ հրապարակեց՝ ինչպես էր ընտանիքով 4 տարի առաջ մասնակցում Երևանի տոնին…Ոչ մի խոսք, ոչ մի անդրադարձ խաղաղ պայմաններում բանակում սպանվող մեր զինվորի մասին, ոչ մի ցավակցություն կամ սթափության կոչ։
Փաշինյանի օրոք խիստ արդիական դարձան «Որտեղ հաց, այնտեղ կաց», «Ինչպես ուռին ու բարդին, ամեն մարդ իր դարդին» ասացվածքները։
Հոկտեմբերի 13-ին, Մեղրիում, ծառայության ժամանակ չբացահայտված հանգամանքներում հայտնաբերվել է Աղասի Դալլաքյանի մարմինը, հոկտեմբերի 6-ին էլ Վարդենիսի մարտական դիրքերում գտել է 4 ամսվա ծառայող Վահե Հարությունյանի դին։
2 զոհ՝ մեկ շաբաթում։
Երկուսի դեպքում էլ կարդացել ենք. «Պաշտպանության նախարարությունը վշտակցում և զորակցություն է հայտնում զինծառայողի ընտանիքի անդամներին, հարազատներին ու ծառայակից ընկերներին»։
Այսքանը, վերջ։ Անցանք առաջ։ Մի ասացվածք էլ է Փաշինյանի ժամանակ խիստ արդիականացվել՝ «Վերքը տիրոջն է ցավ տալիս»։ Թող անպատժելիության, քաոսի ու անպատասխանատվության որջ դարձած մեր բանակում ծառայող տղաների հարազատները մտածեն, անմեղ զոհերի ծնողները ողբան, դո՞ւք ինչ ունեք մտածելու։ Կերեք, խմեք, կյանքը վայելեք, գարեջրի, գինու, ճագարի, ազնվամորու, ոչխարի փառատոներին մասնակցեք, ուղեղներդ մի՛ ծանրաբեռնեք ուրիշի դարդերով՝ բանակում՝ զոհ, Ադրբեջանը նոր տարածքներ է պահանջում, Բաքվում գերիներ ունենք, 300-ից ավելի անհետ կորածներ, պատերազմից 5 է պակաս…
Իզուր չի, որ Փաշինյանը կյանքի վայելքների իր առօրյան տեսանկարահում ու տարածում է սոցցանցերում։ Դրանով նա լայն զանգվածների համար «Օվերտոնի պատուհանն» է աշխատեցնում՝ ո՞վ ասաց, թե Հայաստանում ամեն ինչ վատ է։ Մի ինձ նայեք, ինձ տեսնողը կասի, որ Հայաստանում ամեն ինչ վա՞տ է։ Բա որ վատ է, ես ինչո՞ւ եմ արխային հեծանիվ քշում, ոտքերս բացած, պատուհանագոգին նստած՝ երաժշտություն լսում, ՔՊ ժողովրդավարության դպրոցում դասախոսություն կարդում։
Դուք էլ ինձ նման վարվեք՝ թքած ունեցեք բոլորի վրա, որովհետև «եղունգ ունես, գլուխդ քորի»։
Ավելացնենք ևս մեկը՝ ռուսականը. Дают- бери, бьют- беги.
