Վերջին օրերին արցախյան 32 կազմակերպության կողմից ձևավորվել է «Արցախի ժողովրդի կարիքների ապահովման» նախաձեռնությունը, որը միտված է առաջնահերթորեն զբաղվելու արցախցիների բնակարանային կարիքների ապահովման հարցերով՝ հաշվի առնելով ՀՀ կառավարությունում քննարկվող համապատասխան ծրագիրը, այսօր հրավիրված քննարկման ժամանակ ասաց «Արցախի ժողովրդի շահերի ու իրավունքների պաշտպանության միություն» ՀԿ նախագահ Արտակ Բեգլարյանը։
Նրա խոսքով՝ վերոնշյալ նախաձեռնությունն առաջին քայլով բաց նամակ է հղել ՀՀ կառավարությանը և նախաձեռնել է ստորագրահավաք։ Փաստաթուղթը արցախահայության հստակ առաջարկներ է պարունակում։
Քննարկմանը ներկա «Արցախյան 3-րդ պատերազմում զոհված և անհայտ կորած զինծառայողների հարազատների միություն» ՀԿ նախագահ Արմեն Ասրյանն իր հերթին բարձրաձայնեց բաց նամակի որոշ առաջարկներ՝ արցախցիների բնակարանային ծրագրի իրագործման ժամկետ սահմանել երկու տարին, բնակարան ձեռք բերելու նպատակով յուրաքանչյուր բռնի տեղահանված անձի անվերադարձելիւության սկզբունքով հատկացնել բազային 5 միլիոն դրամ։
Արտակ Բեգլարյանը հավելեց, որ ծրագրի շրջանակներում մինչ այս պահը ՀՀ կառավարության կողմից բավարար ներառական քննարկումներ չեն եղել, բացառությամբ փետրվարի ամսին տեղի ունեցած մեկ ընդհանուր քննարկում, որտեղ ինքը և ներկա մյուս արցախցիները տարաձայնություններ են ունեցել կառավարության կողմից նախանշված գումարի մասով (բնակարան գնելու կամ տուն կառուցելու համար գործադիրը մտադիր է յուրաքանչյուր արցախցու 3 միլիոն դրամ հատկացնել՝ խմբ.)։
«Ես ուսումնասիրել եմ շուկան. մարզային համայքներում՝ Երևանից նույնիսկ տասնյակ կիլոմետրեր հեռու, միջինը 320-500 հազար դրամ է՝ երկրորդային շուկայի, միջին վիճակում գտնվող տների։ Կառավարությունը շուկայական գները հաշվի չի առել»,- ասաց բանախոսը։
Անդրադառնալով Հայաստանից հեռացած արցախցիների թեմային՝ Արտակ Բեգլարյանը նշեց, որ թեև հստակ թվային տվյալների չեն տիրապետում, սակայն գիտեն, որ խոսքը, մոտավոր տվյալներով, 30 հազար արցախցու մասին է։ Բեգլարյանի խոսքով, ամեն դեպքում, ակնհայտ է, որ հեռացողների թիվը բավականին մեծ է, ավելին՝ սոցիալական և բնակարանային անբավարար ծրագրերի ֆոնին աճի միտումը շատ ակներև է։
«Մենք լուրջ մտավախություն ունենք, որ եթե արցախցիները առաջարկները հաշվի չառնվեն, գարնանն արտագաղթի ճանապարհն ընտրած արցախցիների թիվը կտրուկ աճելու է»,- ասաց նա։
Վերջում Արտակ Բեգլարյանը շեշտեց՝ ռազմավարական առումով բոլոր արցախցիների նպատակը պետք է լինի Արցախ վերադառնալը՝ արժանապատիվ և անվտանգ կյանքի ապահովմամբ։
«Պետք է քաղաքական դիրքորոշում և ռազմավարություն փոխվի, բայց հստակ է, որ ՀՀ իշխանությունները չեն ցանկանում քաղաքական առումով որևէ պատասխանատվություն ստանձնել Արցախի ժողովրդի հավաքական վերադարձի համար։ Այդ հարցը միջազգային հարթակներում և Ադրբեջանի հետ բանակցություններում չի քննարկվում»,- ամփոփեց Արտակ Բեգլարյանը։
