Հայ ժողովուրդն անկասկած ունի պոտենցիալ՝ նորից վերագտնելու իրեն և ազատագրական պայքարի նոր փուլ սկսելու, Azg.am-ի թղթակցի հետ զրույցում ասաց քաղաքագետԱլեքսանդր Մանասյանը՝ կիսելով Արցախի Հանրապետության ԱԺ նախկին նախագահ Աշոտ Ղուլյանի՝ այսօր հայտնած այդ միտքը։
«Կա իրավական փաստարկների հսկայական փաթեթ, որը չենք օգտագործում, կա նվիրյալների բանակ, որը պատրաստ է այդ գործն անել, կա արտերկրում մեր համախոհների բանակ։ Ընդ որում՝ խոսքս միայն հայերի մասին չէ. բազմաթիվ են Արցախյան խնդրի և մեր ժողովրդի այլազգի համակիրները, պարզապես պետք է բոլոր այս ուժերին համախմբել։
Այդ գործը պետք է սկսվի, և ես հավատում եմ, որ եթե հարկ եղածի պես կռվենք այդ ճակատում, անկասկած հաջողության կհասնենք»,- նշեց քաղաքագետը։
Ալեքսանդր Մանասյանի խոսքով՝ նախ պետք է հաջողել տեղեկատվական ճակատում՝ շտկելով և իմաստավորելով մեր թույլ տված սխալները։
«Սխալ բանաձևերով չենք կարող գնալ գրոհի։ Դա ազատագրական պայքարի փուլի սկիզբն է։ Դրանով է ամեն ինչ սկսվում, բայց չի վերջանում։ Իհարկե, կորցնողներն իրենց կորցրել են, բայց քիչ չեն նաև նրանք, որոնք իրենց չեն կորցրել, շարունակում են պայքարը, և ազգային գաղափարների կրող մեր երիտասարդները պետք է հետևեն լավատեսությամբ պայքար տանողների օրինակին»,- ասաց մեր զրուցակիցը։
Ալեքսանդր Մանասյանը բարձր գնահատեց Արցախի Հանրապետության Ազգային ժողովի՝այսօր կայացած հանդիսավոր նիստը՝ շեշտելով, որ նմանօրինակ միջոցառումները կարող են և պետք է առաջ ընթանալու մեկնակետ դառնան։
«Ի վերջո, ինչ-որ տեղից պետք է սկսել, և Արցախի պետական-պաշտոնական ինստիտուտների կողմից արվող նմանօրինակ քայլերը հենց այն խթանն են, որ կարևոր գործընթացների սկիզբ կդնեն։ Համոզված եմ, որ լավ կռվողները երբեք չեն հուսահատվում»,- ամփոփեց Ալեքսանդր Մանասյանը։
Հիշեցնենք, որ Արցախի Հանրապետության Ազգային ժողովի նախկին նախագահ Աշոտ Ղուլյանն այսօր հայտարարել էր՝ ուզում է շնորհավորել բոլոր նրանց, ովքեր հավատում են, որ հայ ժողովուրդը փառահեղ ճանապարհ է անցել և ունի պոտենցիալ՝ նորից մեզ վերագտնելու և ազատագրական պայքարի նոր փուլ սկսելու համար։
Հարցին՝ արցախցիների վերադարձն Արցախ ի՞նչ ճանապարհով է տեսնում, և ինչ պետք է անել դրա համար, նախկին պաշտոնյան պատասխանել էր. «Բոլոր հնարավոր ճանապարհներով։ Ամեն ինչ պետք է օգտագործել»։
