Վ. Ա.
Մոլդովայի օմբուդսմեն Աուրելիա Գրիգորիուն դիմել է երկրի դատախազությանը եւ ոստիկանությանն ու խնդրել, որ «վերջ տրվեն իր հանդեպ անօրինականություններին»: Համենայն դեպս, երեկ vesti.az-ը տարածել է այդ բովանդակությամբ մի «փաստաթուղթ», որից պարզվում է հետեւյալը. Ռիշկան բնակավայրի` Աուրելիա Գրիգորիուին սեփականության իրավունքով պատկանող տուն փորձել է մուտք գործել ոստիկանության աշխատակից Միխայիլ Վասուլյանը` պատճառաբանելով, թե «բնակիչներից կան բողոքներ, որ օմբուդսմեն Աուրելիա Գրիգորիուն անօգնական է թողել 80-ամյա մորը, իսկ վերջինս էլ բնակարանում շներ է պահում եւ ստեղծում հակասանիտարական վիճակ»:
Խնդիրն ի՞նչ է` թող պարզեն մոլդովական իրավապահները: Մեզ համար հետաքրքրություն է ներկայացնում հիշյալ ադրբեջանական լրատվամիջոցին Աուրելիա Գրիգորիուի տված մեկնաբանությունը. «Իհարկե, այն, ինչ ներկայումս իմ շուրջն է կատարվում, հայկական համայնքի ջանքերի արդյունքն է: Մոլդովայի հայկական համայնքի ակտիվիստ Էռնեստ Վարդանյանը մշտապես իր հրապարակումներում այդ մասին է խոսում: Ավելին, մեր իշխանություններն էլ ջանք չեն խնայում» (տես http://www.vesti.az/news/168058):
Մոլդովայի օմբուդսմենի կարծիքով`«կարելի է պատկերացնել ինչ կլինի», երբ ավարտվեն իր լիազորությունները: Նա գտնում է, որ «եթե ամեն ինչ շարունակվի նույն «անօրինականության» (չակերտները մերն են- Վ. Ա.) ոգով, ապա իրեն հարկ կլինի «լրջորեն զբաղվել քաղաքական ապաստանի հարցով», որպեսզի ապահովի ընտանիքի եւ իր անվտանգությունը: Նա չի բացառել, որ դիմի Ադրբեջանի ղեկավարությանը`«խնդրելով քաղաքական ապաստան տալ ընտանիքին եւ իրեն»:
Աուրելիա Գրիգորիուն փաստորեն որեւէ այլ երկրում, նույնիսկ հարազատ Ռումինիայում իր համար «անօրինություններից պաշտպանված» ապագա չի տեսնում, բացի Ադրբեջանից: Ըստ էության, ասվածը կարելի է համարել «խոստովանական ցուցմունք»: Այդ կերպ նա հաստատում է, որ Երեւանում ելույթ է ունեցել Ադրբեջանի ղեկավարության համաձայնությամբ կամ ուղղակի կատարել պաշտոնական Բաքվի ցանկությունը:
Միաժամանակ էլ նրա խոսքերի ենթատեքստում կարելի է ադրբեջանական կողմին կշտամբանք տեսնել, թե ինչո՞ւ իրեն մենակ են թողել: Բացառված չէ, որ նա նաեւ սպառնում է, որ կարող է բացահայտումներ անել իր եւ Ադրբեջանի ղեկավարության պայմանավորվածությունների մասին: Բայց դա արդեն իրոք անօգնական կնոջ հուսահատ ճիչ է. Բաքվում նրան ոչ միայն քաղաքական ապաստան չեն տրամադրի, այլեւ ուշադրության իսկ չեն արժանացնի:
Իլհամ Ալիեւը հո չի՞ խոստովանելու, որ տիկնոջն անհարմար դրության մեջ է դրել եւ պատրաստ է «ջենտլմենի» նման կիսել պատասխանատվությունը: Դա գրեթե բացառված է: Ընդհակառակը, Ադրբեջանում իշխող վարչախումբն ամեն ինչ անելու է, որպեսզի այդ գործին պաշտոնական առնչություն չունենա: Փոխարենն, ըստ երեւույթին, Իլհամ Ալիեւի աշխատակազմից լրատվամիջոցները հրահանգավորվել են «աշխատել Մոլդովայի ադրբեջանական համայնքի հետ»:
Խնդիր է դրված, որ ի պաշտպանություն Աուրելիա Գրիգորիուի Մոլդովայում բնակվող ադրբեջանցիները զանգվածային միջոցառումներ կազմակերպեն: Vesti.az-ն ուղղակի գրել է. «Մեր հերթին կոչ ենք անում Մոլդովայի ադրբեջանական համայնքինՙ ակտիվացնել ջանքերն ի պաշտպանություն այդ «հերոսական» (չակերտները մերն են- Վ. Ա.) կնոջ եւ նրա ընտանիքի»:
Բացառված չէ, որ իրավիճակին փորձեն միջամտել նաեւ ադրբեջանական հատուկ ծառայությունները` քողարկվելով Մոլդովայում Ադրբեջանի դիվանագիտական ներկայացուցչությունների հովանու ներքո, որպեսզի Քիշնեւում սադրեն հայ-ադրբեջանական լարվածություն: Այնպես որ, թվում է, անհրաժեշտություն կա Իլհամ Ալիեւից քաղաքական ապաստան խնդրելու մասին Աուրելիա Գրիգորիու հայտարարությանն ու դրանից ենթադրվող զարգացումներին նայելու լրջորեն:
