Արևմտյան Ադրբեջանի համայնքը հայտարարություն է տարածել Եվրամիության խորհրդի նախագահ Շառլ Միշելի կողմից 2023 թվականի դեկտեմբերի 12-ին «Ազատություն» ռադիոկայանի եթերում հեռարձակված հարցազրույցում իրականացված էթնիկ և կրոնական խտրականության վերաբերյալ:
Հայտարարության մեջ նշվում է, որ, խոսելով Ադրբեջանի և Հայաստանի միջև հարաբերություններում ազգային փոքրամասնությունների խնդրի մասին, Շառլ Միշելը մանրամասն խոսել է էթնիկ հայերի Ադրբեջան վերադարձի մասին, սակայն ոչ մի խոսք չի ասել վտարված ադրբեջանցիների վերադարձի մասին՝ Հայաստան։
Ադրբեջանում ցեղասպանության ենթարկված ու սպանդից մի կերպ փրկված կես միլիոն հայերից ոչ ոք այսքան ժամանակ չի ասել, թե Ադրբեջանն իրենց հայրենիքն է, որ իրենք հայրենիքից են զրկվել, չի ասել, որ այն, օրինակ՝ Հարավարևելյան Հայաստանն է, որտեղ իրենք ծնվել ու ապրել են։ Կարող էին, չէ՞ այդպես ասել։ Բայց չեն ասել։
Իսկ ադրբեջանցիների հավակնությունները Հայրենիքի՛ հավակնություններ են, նրանք ոչ թե ասում են, որ Հայաստանի Հանրապետության, հայերի Հայրենիքում ուղղակի ապրել են՝ որպես ազգային փոքրամասնություն, որտեղից 1990-ականներին ազգամիջյան հակասությունների պատճառով առոք-փառոք տեղափոխվել են Ադրբեջան՝ գույքը վաճառած կամ փոխանակած, առանց մարդկային կամ այլ կորուստ կրելու, այլ պնդում են, որ Հայաստանն իբր իրենց Հայրենիքն է, որի «իրական անունն արևմտյան Ադրբեջան է»։ Նրանք ոչ թե բարձրաձայնում են որպես ազգային փոքրամասնություն՝ Հայաստանում ապրած լինելով՝ Հայաստան վերադառնալու «իրավունքի» մասին, այլ բողոքում են, որ իրենց իբր թե վտարել են իրենց հայրենիքից։ Եվ այս կեղծ, զրպարտչական թեզն անընդհատ կրկնելով՝ նրանք փորձում են մատուցել որպես «պատմական ճշմարտություն»։ Իսկ քանի որ Հայաստանի իշխանություններն այդ թեզին պատասխանում են լռությամբ ու հանդուրժողականությամբ, այսինքն՝ չկա առաջնահերթ դրա դեմ պայքարողը, բերանները ծեփողը, հետևաբար, «արևմտյան Ադրբեջան» ալիևյան կեղծ կառույցը ինչ ուզի, կբարբաջի, սուտը ճշմարտության տեղ կմատուցի ու կշշպռի անգամ Շարլ Միշելին։
Եթե Հայաստանը չի պաշտպանում իր իրավունքները, պատմական ճշմարտությանը տեր չի կանգնում, օտար մե՞կը պիտի պաշտպանի մեզ կամ ասի, որ ադրբեջանցիները ստում են։
Եվ ուրեմն «արևմտյան Ադրբեջանի համայնքը» պատասխանել է Միշելին.
«Ցանկանում ենք հիշեցնել, որ արևմտյան Ադրբեջանի համայնքը բազմիցս դիմել է Եվրամիությանը, այդ թվում՝ անձամբ Շառլ Միշելին՝ խնդրելով աջակցել Հայաստանից վտարված ադրբեջանցիների վերադարձի իրավունքին, օգնել նրանց այցելել իրենց տները, գերեզմանները,մշակութային հուշարձաններ, որոնք մնացել են այնտեղ։ Եվրամիությունը անտեսեց վտարված ադրբեջանցիների այս կոչերը։
Եվրամիության այս ընտրողական դիրքորոշումը հակասում է մարդու իրավունքներին և բացասաբար է անդրադառնում Ադրբեջանի և Հայաստանի միջև հարաբերությունների կարգավորման գործընթացի վրա։
Արևմտյան Ադրբեջանի համայնքը կոչ է անում Եվրամիությանը աջակցություն հայտնել Հայաստանից վտարված ադրբեջանցիների վերադարձի իրավունքին, վերջ դնել երկակի ստանդարտներին, էթնիկական խտրականության քաղաքականությանը և Ադրբեջանի և Հայաստանի միջև խաղաղությունը կանխելու փորձերին»,- ասվում է հայտարարության մեջ։
Խաղաղության կտերով Ալիևի «արևմտյան Ադրբեջան» պրոյեկտը հայ ժողովրդի ականջն է լցնում, թե համակերպվեք ու հարմարվեք մեր գոյությանը Հայաստանում։ Գալու ենք ու ապրենք այդտեղ։ Խաղաղություն միայն այն դեպքում կլինի, երբ ադրբեջանցիները վերադառնան «արևմտյան Ադրբեջան», որի անունը դուք՝ հայերդ, Հայաստան ենք դրել։
Շատ ծանոթ թեզ է, չէ՞։ Անմիջապես հիշում ենք Ալեն Սիմոնյանի հայտարարությունը՝ հայերն ու ադրբեջանցիները պետք է ապրեն կողք կողքի ու առևտուր անեն իրար հետ։ Ու դա պիտի լինի ոչ թե Ադրբեջանում, այլ Հայաստանի տարածքում։
Պաշտոնական Բաքուն ու պաշտոնական Բաքվի մասնաճյուղ Երևանը սինքրոն աշխատում են։
