Ամերիկացիները կփորձեն նրան մեղադրել պատերազմական հանցագործությունների մեջ
Սիրիայի նախագահ Բաշար Ասադը ամերիկյան Fox News հեռուստաալիքին տված հարցազրույցում ասել է, որ իր երկիրը պատրաստ է կատարել քիմիական զենքին վերաբերող համաձայնության պայմանները: «Սիրիան մեկ շաբաթվա ընթացքում իր զինանոցներին առնչվող բոլոր տվյալները կուղարկի Քիմիական զենքի արգելման կազմակերպություն», հայտարարել է Ասադը:
Նրա խոսքերով, Սիրիան համաձայն է իր քիմիական զենքը հանձնել ամեն մի երկրի, որն այն կընդունի ոչնչացնելու նպատակով: Ասադի կարծիքով, այդ քիմիական զենքի ոչնչացման գործողությունը տեխնիկապես շատ բարդ է. այն կպահանջի մոտավորապես 1 մլրդ դոլար եւ կտեւի առնվազն 1 տարի:
Բաշար Ասադը հայտարարել է, որ օգոստոսի 21-ին Դամասկոսի արվարձան Գուտայում քիմիական զենքի օգտագործման պատասխանատվությունը ընկած չէ կառավարական ուժերի վրա. իշխանություններն ունեն ապացույցներ, որ զարին օգտագործել են ահաբեկչական խմբավորումները:
Նախագահը նաեւ ասել է, որ Սիրիայում առկա է ոչ թե քաղաքացիական պատերազմ, այլ «Ալ Ղաիդայի» հարձակում: Ասադի խոսքերով, Սիրիայում կռվում են տասնյակհազարավոր գրոհայիններ, ըստ որում նրանց 80-90 տոկոսը կապված է «Ալ Ղաիդա» ահաբեկչական ցանցի եւ հարակից խմբավորումների հետ:
Իր հերթին Մոսկվան սեպտեմբերի 19-ին հայտարարել է, որ պատրաստվում է հնարավորինս շուտ ՄԱԿ-ի ԱԽ-ին փոխանցել ապացույցներ, որ հենց սիրիական ընդդիմությունն է քիմիական զենքի օգտագործել: ԻՏԱՌ-ՏԱՍՍ-ը մեջբերում է ՌԴ փոխարտգործնախարար Միխայիլ Բոգդանովի այն խոսքերը, որ ապացույցները ՄԱԿ-ին կհանձնվեն սեպտեմբերի 20-ին:
Ինչ վերաբերում է ամերիկացի դիվանագետներին, նրանք սիրիական ընդդիմության օգնությամբ հավաքել են նյութեր, որոնք թույլ կտան մեղադրել Բաշար Ասադին պատերազմական հանցագործությունների մեջ: Այդ մասին հաղորդում է Yahoo News-ը, վկայակոչելով ԱՄՆ-ի հատուկ հանձնարարությունների դեսպան Սթիվեն Ռապին:
Այդ դիվանագետի խոսքերով, ԱՄՆ-ը նյութեր է հավաքում Ասադի նկատմամբ քրեական գործ հարուցելու նպատակով: Սիրիացի ընդդիմադիրների որոշ խմբեր հատուկ պատրաստություն են անցել, որպեսզի սովորեն փնտրել եւ նույնականացնել անհրաժեշտ տեղեկությունները: Արդեն հավաքված են 200 հազար էջից ավելի նյութեր, որոնք պահվում են Եվրոպայի տարածքում ԱՄՆ-ի ստեղծած կենտրոնում:
Դիվանագետն ասել է, որ ԱՄՆ-ի իշխանությունները մտադիր են ստեղծել յուրատեսակ «խառը դատարան»ՙ ներգրավելով թե՛ «միջազգային խաղացողներին» եւ թե՛ սիրիացիներին:
