Մարդիկ չէին սպասում, թե ՀՀ կառավարությունն ինչ կանի Արցախից բռնի տեղահանված 100 հազար մարդկանց ընդունելու, կացարանով ու սնունդով ապահովելու համար։ Իրենք էին անում ամեն ինչ. Եվրախորհրդարանում, իր ելույթի ժամանակ ասաց ՀՀ վարչապետ Նիկոլ Փաշինյանը։
Այնուհետև շնորհակալություն հայտնեց Եվրամիությանը, որ արդեն հատկացումներ են արել Արցախից բռնի տեղահանվածներին օգնելու համար։
«Ցավալի է, որ ի հեճուկս Եվրոպական խորհրդարանի, ԵԽԽՎ-ի, ՄԻԵԴ-ի կոչերի՝ ի վիճակի չեղանք կանխել ԼՂ-ի էթնիկ զտումները։ ՄԱԿ-ի ԱԽ-ում Լաչինի միջանցքը բացելու 3 քննարկում է եղել, բայց՝ անօգուտ։ Ռուսաստանի խաղաղապահների անգործության հետևանքով ԼՂ-ի հայերը զանգվածաբար լքեցին իրենց տները։ Ադրբեջանը հստակ ու աներկբա ի ցույց էր դրել ԼՂ հայերի կյանքն անհնար դարձնելու ծրագրերը։ Լաչինի միջանցքը փակելուց հետո Ադրբեջանը ֆիզիկական ու հոգեբանական ճնշումների է ենթարկել ԼՂ հայությանը, իսկ միջանցքը բացեց, որպեսզի ԼՂ-ը հայաթափվի, հայերը հեռանան իրենց տներից։
Ի հեճուկս բոլոր պատերազմների ու ճգնաժամերի՝ ես Եվրոպայի խորհրդարան եմ եկել ասելու, որ մեր տարածաշրջանն ունի խաղաղության կարիք։ Խաղաղության մասին մեր պատկերացումները չենք հակադրում մեր տարածաշրջանի շահերին։ Մենք խաղաղության գործընթաց ենք ստանձնել։ Բայց արդյո՞ք հնարավոր է այդ գործընթացը, եթե տեղի են ունենում էթնիկ զտումներ, եթե կան զոհեր ու անհետ կորածներ»։
Փաշինյանը շեշտեց, որ ըստ բազմաթիվ պայմանավորվածությունների՝ հայաստանը ճանաչում է Ադրբեջանի տարածքային ամբողջականությունը՝ 86.600 քկմ տարածքով, իսկ Ադրբեջանը ճանաչումէ Հայաստանի տարածքային ամբողջականությունը՝ 29.800 քկմ տարածքով։
Այնուհետև Փաշինյանը դիտարկեց, որ Ադրբեջանի նախագահ Ալիևը մի քանի անգամ հայտարարել է, որ ճանաչում է Հայաստանի տարածքային ամբողջականությունը, սակայն չի նշել՝ քանի քառակուսի կիլոմետր տարածքով։
«Արդյո՞ք դա 29.800 քկմն է, որի շուրջ պայմանավորվածություն կա»,- հարցրեց Փաշինյանը։
Հայաստանն ու Ադրբեջանը առանց միջանցքային խոսակցությունների՝ միմյանց համար պետք է բացեն ճանապարհները։
Իսկ ինչ վերաբերում է «Զանգեզուրի միջանցքին», որը շեշտում է Ադրբեջանը, նման պայմանավորվածություն Ալիևի հետ չի եղել։ Միջանցք նշանակում է արտատարածքային հատված, ինչի վերաբերյալ երբեք որևէ պայմանավորվածություն չի եղել. նշեց Փաշինյանը։
«Պաշտոնական Բաքուն միջանցքային խոսույթը նենգափոխում է տարածաշրջանում նոր պատերազմ հրահրելու, Հայաստանից նոր տարածքներ գրավելու կամ Հայաստանը շրջափակման մեջ պահելու համար»,- եվրոպացի պատգամավորներին ասաց Հայաստանի վարչապետը։
Նա նշեց, որ Հայաստանի 1016 քաղաքացի համարվում է անհետ կորած։ Հայաստանը պատրաստ է գերիների վերադարձն ապահովել «բոլորը բոլորի դիմաց» սկզբունքով, Ադրբեջանին տալ ականապատված տարածքների բոլոր քարտեզները։
