Ադրբեջանի նախագահի աշխատակազմի քաղաքական վերլուծության եւ տեղեկատվական ապահովման բաժնի վարիչ Էլնուր Ասլանովը բացառիկ հարցազրույց է տվել իշխանական 1news.az-ին: Առիթը Իլհամ Ալիեւի աշխատակազմի ղեկավար Ռամիզ Մեհթիեւի` ընդդիմության թեկնածու Ջամիլ Հասանլիին իբր թե «25 տոկոս գրելու մասին ԱՄՆ պաշտոնական ներկայացուցիչների խնդրանքի» վերաբերյալ հայտարարությանը Միացյալ Նահանգների պետքարտուղարության արձագանքն է, որով Մեհթիեւի ասածները բնութագրվել են որպես «բացահայտ կեղծիք»:
Էլնուր Ասանովն ասել է, որ նախագահական «ընտրություններին» նախորդած ժամանակահատվածում Ադրբեջանի նախագահի աշխատակազմի եւ կառավարության ներկայացուցիչներն ամերիկյան կողմի հետ «մշտական շփումներում շեշտել են նախագահ Ալիեւի բարձր վարկանիշը եւ անայլընտրանքայնությունը, ինչպես նաեւ պետության ղեկավարին բնակչության կողմից աջակցությունը` շնորհիվ իրականացված ահռելի սոցիալ-տնտեսական ծրագրերի»:
Այնուհետեւ իլհամալիեւյան վարչախմբի ներկայացուցիչը սենսացիոն հայտարարություն է արել, ըստ որի «նախագահի աշխատակազմի ղեկավար Ռամիզ Մեհթիեւի կողմից նշված թվերը (Իլհամ Ալիեւի եւ Ջամիլ Հասանլիի ձայների 75:25 տոկոսի հարաբերակցության մասին – Վ.Ա.) նախագահի աշխատակազմի եւ կառավարության ներկայացուցիչների հետ բազմաթիվ հանդիպումներում հնչեցվել են ամերիկյան, մասնավորապես` դեսպան Մորնինգսթարի կողմից»:
Զարգացնելով միտքը, Ասլանովն այնուհետեւ «անթույլատրելի» է համարել, «երբ փակ հանդիպումներում ասվում է մի բան, իսկ մամուլի համար հայտարարություններում` բոլորովին այլ բան»: Իլհամ Ալիեւի աշխատակազմի պաշտոնյան չի զլացել տալու նաեւ ԱՄՆ պետդեպարտամենտի ընդհանրական բնութագիրը, ըստ որի`«թե ինչ արժեն նրանց (պետական դեպարտամենտի ներկայացուցիչների) իրական արարքներն ու հերքումները, ողջ աշխարհը գիտի Wikileaks-ի օրինակով»:
Տառացիորեն նախօրեին ադրբեջանական կայքերից մեկում վերլուծական էր հրապարակվել, որի հեղինակը տարակուսել էր, թե չի հասկանում` ինչո՞ւ են «իշխանությունները հետեւողականորեն փչացնում Վաշինգտոնի հետ առանց այդ էլ ոչ բարվոք վիճակի հարաբերությունները»:
Իրոք, Իլհամ Ալիեւի հակամերիկյան հիստերիան, որն Էլնուր Ասլանովի կողմից դեսպան Մորնինգսթարի փաստացի «ընտրակեղծարարության» մեջ մեղադրանքով արդեն բոլոր սահմաններից դուրս է եկել, տրամաբանության մեջ, կարծես, չի տեղավորվում:
Մնում է մի ենթադրություն անել, նա մտադիր է դիվանագիտական սկանդալ սադրել Միացյալ Նահանգների հետ: Հաշվարկն, ըստ երեւույթին, կառուցված է այնպես, որ «ընտրակեղծարարության» մեջ մեղադրվող դեսպան Մորնինգսթարին Սպիտակ տունն ստիպված կլինի ետ կանչել: Եվ քանի որ ԱՄՆ-ում նոր դեսպանի նշանակումը կապված է Կոնգրեսում նրա թեկնածությանը հավանություն տալու-չտալու ընթացակարգի հետ, ապա հնարավոր է, որ ամիսներ շարունակ Ադրբեջանում Միացյալ Նահանգների դիվանագիտական ներկայացուցիչը մնա գործերի հավատարմատարի կարգավիճակով:
Իսկ դա իր հերթին ենթադրում է երկկողմ հարաբերությունների ոչ վստահելի եւ անհամեմատ ցածր մակարդակ: Ըստ երեւույթին, Իլհամ Ալիեւին խիստ անհրաժեշտ է մի որոշակի ժամանակահատվածով Սպիտակ տան համար «անհասանելի» դառնալ: Թե ինչո՞ւ` այլ խնդիր է: Ենթադրություններ կարելի է անվերջ անել:
Մինչդեռ ակնհայտ է, որ Իլհամ Ալիեւը Միացյալ Նահանգների հետ հարաբերությունները սրում է գիտակցաբար: Բացառված է, թե նա չի գիտակցում, որ Վաշինգտոնի պատասխանը կլինի «համարժեքորեն» ավելի խիստ: Մնում է մտածել, որ դա արվում է, որպեսզի արտաքին քաղաքական վերակողմնորոշման համար հող նախապատրաստվի:
