Warner Brothers կինոստուդիան նոր անակնկալ է մատուցելու պատմական հայտնի կերպարների սիրահարներին: Ջերեմի Դոների սցենարում Նապոլեոն Բոնապարտը բոլորովին նոր կերպարով է ներկայանում, ըստ որիՙ այն, ինչ մինչ այժմ հայտնի էր ֆրանսիացի կայսրի եւ զորավարի մասին, ճշմարիտ չէ, անգամ նրա կարճահասակ լինելը: Ջ. Դոները ամիսների հետազոտական աշխատանքներ է կատարել մինչեւ սցենարը գրելը, եւ Warner ստուդիան ուրախությամբ է ընդունել այնՙ տեսնելով այնտեղ Մարտին Սկորսեզեին եւ Լեոնարդո ԴիԿապրիոյին կրկին միավորելու հնարավորություն:
Սակայն Սկորսեզեին ժամանակը ամենայն հավանականությամբ չի բավարարի ստանձնելու ֆիլմի ռեժիսորական աշխատանքները, եւ կինոստուդիան դիմել է «Սպիտակաձյունիկը եւ որսորդը» ֆիլմի ռեժիսոր Ռուպերտ Սանդերսին: Գլխավոր դերակատարման համար կինոստուդիան փորձելու է ստանալ Լեոնարդո ԴիԿապրիոյի կամ Թոմ Հարդի համաձայնությունը:
«Նապոլեոն» ֆիլմի կոնցեպցիան հիմնականում ֆրանսիացի զորավարի մասին մինչ այժմ հայտնի փաստերիՙ ոչ ճշմարիտ լինելու բացահայտումն է: Դոների սցենարում Նապոլեոնը նման է մաֆիոզական կլանի ղեկավարի:
Նապոլեոնի վերջին կեպարը ամերիկյան «Գիշերը թանգարան-2-ում» արկածային ֆիլմում ներկայացրել է ֆրանսիացի դերասան Ալեն Շաբան:
Այս տարվա գարնանը Սթիվեն Սփլիբերգն ասել էր, որ Ստենլի Կուբրիկի սցենարով պատրաստվում է ձեռնարկել մինիսերիալանոց ֆիլմի նկարահանման աշխատանքներըՙ Նապոլեոն Բոնապարտի մասին: Դեռեւս 60-ականներին Կուբրիկը մտադրվել էր ծավալուն կենսագրական ֆիլմ նկարահանել ֆրանսիացի զորավարի մասին, սակայն ծրագիրը փակվել էր ֆինանսների պատճառով: Այս մասին տեղեկացնում է ռուսական կինոկայքերից մեկը:
Նապոլեոնի նոր կերպարըՙ ամենայն հավանականությամբ Լեոնարդո ԴիԿապրիոյի կատարմամբ, փաստորեն, նոր վերաբերմունք կամ մեկնաբանություն է լինելու, ինչպես հաճախ է պատահում պատմական կերպարների էկրանավորումներում, հատկապես վերջին շրջանում, իսկ գուցեՙ իրականում սցենարիստի հետազոտական աշխատանքների արդյունքումՙ պատմական նոր փաստերի ի հայտ բերո՞ւմ լինի:
