Իսկ «բաց երկնքի» քաղաքականությունը արդեն բերում է ավիատոմսերի գների էժանացման
«Հուսով ենք, որ հաջորդ տարվա գարնանից Հայաստանում կսկսի գործել առաջին բյուջետային ավիաընկերությունը` Երեւանը կապելով Եվրոպայի մոտ 10 երկրների հետ», լրագրողների հետ երեկ տեղի ունեցած հանդիպման ժամանակ ասաց Հայաստանի ազգային մրցունակության հիմնադրամի գործադիր տնօրեն Արման Խաչատրյանը: Նա նշեց, որ այդ ուղղությամբ բանակցություններ են ընթանում, եւ ինքը դեռ չի կարող հայտնել ավիաընկերության անունը:
Արման Խաչատրյանը տեղեկացրեց, որ բյուջետային ավիաընկերությունները, ընտրելով երկրորդային օդանավականներ, որոնց սակագները բարձր չեն, ինքնաթիռում մատուցելով սահմանափակ ծառայություններ, տնտեսում են գումար եւ առաջարկում են ավելի մրցունակ գներ, քան մյուս ավիափոխադրողները:
Խոսելով Հայաստանի կառավարության կողմից ավիացիայում «բաց երկնքի քաղաքականության» անցնելու արդյունքների մասինՙ Արման Խաչատրյանը նշեց, որ դրա 3-4 տարվա ընթացքում կապահովի 1,5 տոկոս տնտեսական աճ, կստեղծվեն 20 հազար նոր աշխատատեղեր, 20-25 տոկոսով կաճեն ուղեւորափոխադրումների ծավալները, 10-50 տոկոսով կնվազեն ավիատոմսերի գները: Նրա հավաստմամբՙ այդ քաղաքականությունն արդեն ազդել է ավիատոմսերի գների վրա: 40 տոկոսով էժանացել են Երեւան-Դուբայ ավիատոմսերի գները` 200 հազար դրամից դառնալով 120 հազար, նախկինում շաբաթական իրականացվող 3-4 չվերթի փոխարեն իրականացվում է 11 չվերթ: Երեւան-Մոսկվա ավիատոմսի գինը 200 հազար դրամից դարձել է 160 հազար դրամ:
