Իրաքի երկրորդ մեծ քաղաքումՙ Մոսուլում գտնվող հայկական Սուրբ Էջմիածին եկեղեցու վրա իրագործված հարձակումից հետո տասնյակ հայ ընտանիքներ ստիպված են եղել հեռանալ քաղաքից: Ըստ «Արմինյն Միրոր-Սփեքթեյթր» շաբաթաթերթի տվյալների, երկրում մնացել են մոտ 15-16 հազար առաքելական եկեղեցու հետեւորդ հայեր, որոնք հիմնականում ապրում են Բաղդադում, Բասրայում, Կիրկուկում եւ Մոսուլում: Երկրի հյուսիսային շրջաններում, Բաղդադում եւ Բասրայում ապրում են նաեւ 5-6 հազար ավետարանական եկեղեցու հավատացյալներ: Հայկական համայնքներ կան նաեւ Էրբիլում եւ Դահուկում: Հյուսիսային Իրաքի Կանդիլ լեռներում տեղակայված Քուրդիստանի աշխատավորական կուսակցության (PKK) առաջնորդները հայտարարել են, որ իրենց զինյալ միավորումները պատրաստ են դիմակայելու ISIS-ի հարձակումներին եւ անվտանգ միջանցք ապահովելու, որպեսզի քուրդ, արաբ, թուրքմեն եւ հայ փախստականներ կարողանան տեղափոխվել այլ շրջաններ: Ըստ նրանց, PKK-ի մարտիկները համագործակցում են Պեշմերգա ռազմական միավորումների հետ:
ISIS-ի (Islamic State of Iraq and Syria կամ al Sham) լավ զինված, լավ ֆինանսավորած եւ լավ կազմակերպված ուժերը, ըստ միջազգային լրատվության, Թուրքիայից եւ հյուսիսարեւելյան Սիրիայից են մուտք գործել Իրաք: Դա Իրաքը վերագրավելու Ամերիկայի գաղտնի ծրագրի իրականացումն էր, հավատացած են որոշ քաղաքական մեկնաբաններ, որոնք կասկածի տակ են առնում Մ. Նահանգների «անտեղյակությունը» կատարվածից: «Wall Street Journal»-ը գրել էր, որ իրաքյան ողբերգությունը հանկարծակիի բերեց Մ. Նահանգներին, եւ պատճառ դարձավ, որ քաղաքագետներ եւ զինվորական առաջնորդներ Սպիտակ տանը հավաքվեն եւ քննարկեն իրադրությունը: Դա անտեղյակություն չէր կարող լինել, քանի որ մեկ այլ հատվածում նույն հեղինակավոր թերթը գրել էր, որ Ամերիկան անօդաչու ինքնաթիռներ է գաղտնի ուղարկում Իրաք: Եթե լիբանանյան «Lebanon Daily Star» թերթը դեռ մարտ ամսին տեղյակ էր, որ ISIS-ը իր զորքերը արեւմտյան Սիրիայի Անթաքիա եւ Իդլիբ քաղաքներից դուրս է բերում եւ վերատեղակայում դրանք Իրաքի հետ սահմանի երկայնքով, ինչպե՞ս է, որ ԿՀՎ-ն (CIA), իր անօդաչու ինքնաթիռներով, անտեղյակ էր կատարվածից, հարցնում են նրանք:
Այդ քաղաքագետների մեկնաբանությամբ «ISIS»-ը ՆԱՏՕ-ի եւ ԿՀՎ-ի հովանավորությամբ արդեն երեք տարուց ավելի տեւող հակասիրիական ծրագրի բաղկացուցիչ մասն է: Այդ ծրագրի հետեւում կանգնած են Մ. Նահանգները, Թուրքիան, Սաուդյան Արաբիան եւ Քաթարը: Ծրագրի մանրամասներ նկարագրված են «New Eastern Outlook Journal» (NEO- Արեւելյան նոր աշխարհայացք) պարբերականի զեկուցագրում, նշված են հարյուրավոր միլիոն դոլարների տրամադրումը ISIS-ին, կապը ամերիկյան բանակի Ուեսթ Պոյնտի հակաահաբեկչական կենտրոնի հետ, եւ Իրաքում արհեստական «աղանդավորական պատերազմ» հրահրելու նպատակները, որոնք ուղղված են Սիրիայի եւ Իրանի դեմ: Այս բոլորի հենքի վրա Ամերիկայի «անտեղյակությունը» պարզապես ծառայում է քողարկելու նրա անմիջական մասնակցությունը իրադարձություններին:
«Միջազգային ներում» (Amnesty International) կազմակերպությունը, թվարկելով հանդերձ ISIS-ի կալանավայրերի եւ դրանցում գործադրված (ինչպես արաբ հակառակորդ խմբավորումների անդամների, երեխաների, այնպես էլ օտարազգի լրագրողների դեմ) վայրագությունների մասին, այդուհանդերձ չի հստակեցնում, որ ISIS-ը ամերիկյան հետախուզական ծառայությունների կողմից է ստեղծված, եւ նրա «ճարտարապետները» Ջոն Նեգրոպոնտեն է եւ Սիրիայում Մ. Նահանգների նախկին դեսպան Ռոբերտ Սթիվն Ֆորդը: «Միջազգային ներումը» կոչ է անում ISIS-ին վերջ դնել վայրագություններին, անօրինական կտտանքներին եւ առեւանգումներին, իսկ Թուրքիայի եւ Ծոցի պետություններինՙ դադարեցնել ֆինանսական, նյութական, ինչպես նաեւ ռազմական բոլոր տեսակի օժանդակությունները ISIS-ին: «Միջազգային հանրությունը պարտավոր է կոնկրետ քայլեր ձեռնարկել չեզոքացնելու համար ISIS-ի առաջխաղացումը», նշում է «Միջազգային ներում» կազմակերպությունը:
Քաղվածՙ «Միրոր-Սփեքթեյթրից» եւ համացանցային տարբեր աղբյուրներից
