Այսօրվա պարտության պատճառները երկուսն են՝ նախ՝ հետխորհրդային շրջանում մենք չենք կառուցել ներքին միասնականություն ունեցող հասարակություն և և երկրորդ՝ չենք հասկացել գլոբալ զարգացումների բնույթը, Azg,am-ի թղթակցի հետ զրույցում ասաց քաղաքագետ Ալեքսանդր Մանասյանը։
Նրա համոզմամբ՝ մենք չենք հասկացել, թե որքանով է միջազգային իրավունքը գործում, կամ գործո՞ւմ է առհասարակ։
«Մենք միամիտ ձևով հույսներս դրել ենք այն բանի վրա, որ միջազգային իրավունքը կարող է ցանկացած պահի գործել և օգնության հասնել մեզ։ Իրականում աշխարհն աստիճանաբար գնում է դեպի իրավունքի արժեզրկում։
Սա կարելի էր կանխատեսել, եթե մենք ստեղծեինք գիտական հիմնավորումներով դա ապացուցող հաստատություններ»,- ասաց Ալեքսանդր Մանասյանը։
Քաղաքագետի համոզմամբ՝ հզոր երկրի և մարտունակ բանակի հիմքում տնտեսություն է, մինչդեռ այսօր Հայաստանը դրվել է զուտ ունեցվածքի սեփականաշնորհման ուղու վրա։
«ՀՀ ամեն հաջորդ իշխանություն չի կարողացել երկիրը դուրս բերել այս վիճակից։ Եթե օրվա իշխանությունները չեն տեսնում զարգացումների ընդհանուր օրինաչափությունը, սխալ ձևով են գործում և չեն կարողանում նախանշել զարգացման նոր հեռանկարներ։
Խելացի տնտեսություն չկառուցելու պարագայում 20-30 տարի հետո մենք ունենալու ենք նոր օլիգարխների ցուցակ»,- ասաց Մանասյանը։
Մեր զրուցակիցը շեշտեց՝ փորձ է արվում ամեն խստացում ներկայացնել որպես կոռուպցիայի դեմ պայքար, սակայն ձեռք առնված միջոցները արդյունք են տալու՝ քանի դեռ մենք չենք հասկանում՝ ուր ենք գնում։
«Եթե դուք խլում եք մեկի սեփականությունը՝ փոխանակ նրան սպիտակ դաշտ բերելու, խնդիրները դրանից չեն լուծվում։ Պարզապես պետք է խստագույնս հետևել, որպեսզի եկամուտները չթաքցվեն»,- ասաց մեր Ալեքսանդր Մանասյանը։
Երկիրը ստեղծված ծանր վիճակից դուրս բերելու հարցում, ըստ քաղաքագետի, իր էական դերն ունի նաև բանակը, որի հզորացման ճանապարհով էլ պետք է առաջ շարժվել։
