Azg.am-ի թղթակցին որևէ կերպ չհաջողվեց ճշտել ԱԺ «Քաղաքացիական պայմանագիր» խմբակցության պատգամավորներ Մարիա Կարապետյանի և Արփի Դավոյանի տեսակետները, թե ինչպես են նրանք վերաբերվում Արցախի Հանրապետությա նախկին պետնախարար Ռուբեն Վարդանյանի հայտնած այն հայտարարությանը, որ ամբողջ հայկական աշխարհը պետք է ցուցաբերի նույն մոտեցումը՝ Արցախը բոլոր հայերի հարցն է, ոչ թե միայն արցախցիներինը։
Մարիա Կարապետյանը նախ անջատեց զանգը, այնուհետև հետևյալ բովանդակությամբ կարճ հաղորդագրություն ուղարկեց՝ «Բարև Ձեզ։ Խնդրում եմ գրել՝ ով և ինչ հարցով է զանգում»։
Ներկայանալուց, հարցը ձևակերպելուց և այդ տվյալները հաղորդագրության տեսքով նրան ուղարկելուց հետո, սակայն, Մարիա Կարապետյանն այդպես էլ ո՛չ հետ զանգահարեց, ո՛չ էլ պատասխան հաղորդագրություն ուղարկեց։
Նրա գործընկերուհին՝ Արփի Դավոյանն էլ, դեռ հարցը չլսած, շտապեց տեղեկացնել, որ հեռախոսով հարցազրույց չի տալիս։ Փաստորեն, որքան էլ մենք ցանկանում ենք այս կամ այն հարցի շուրջ համակողմանի տեսակետներ ներկայացնել՝ ապահովելու բազմակարծությունը, խտրականություն չդնելով խորհրդարանական խմբակցությունների անդամների միջև, միևնույն է՝ իշխանական պատգամավորները մեծ մասամբ կամ անպատասխան են թողնում զանգերը կամ խուսափողական պատասխաններ տալիս։
Հ. Գ.
Հանուն արդարության նշենք, որ Azg.am-ի թղթակցին հաշված անգամներ բախտ է վիճակվել լսելու ՔՊ-ական պատգամավորների դիտարկումները և դրանք ներկայացնելու մեր ընթերցողներին։ Մենք ջանում ենք լսել երկու «ճակատների» կարծիքներն ու մեկնաբանությունները, սակայն իշխանական կողմն անգամ պարզագույն տեղեկություն հաղորդելու մեջ է զլանում, մինչդեռ պարտավոր է հիմնավորել, մեկնաբանել քաղաքական այն իրողությունները, որոնք կատարվում են հենց իրենց իշխանավարման օրոք։
