Ապրիլի 23-ին Գերմանիայի նախագահ Գաուքը կմասնակցի Բեռլինում Հայոց ցեղասպանության զոհերի հիշատակին նվիրված հոգեհանգստյան պատարագին, ապրիլի 3-ին հաղորդում է գերմանական հեռուստատեսության երկրորդ ալիքըՙ ZDF- ը։ Գերմանիայի պատմության մեջ առաջին անգամ է, որ դաշնային նախագահը մասնակցում է Հայոց ցեղասպանությանն առնչվող արարողության, հաղորդում է նույն աղբյուրըՙ վկայակոչելով նախագահի խոսնակի այն տեղեկությունը, թե նախագահը դրանով հիշելու է օսմանյան կայսրության հայերի եւ քրիստոնյա փոքրամասնությունների ցավը։
Հրապարակման հեղինակ Այքե Փեթերինգը այնուհետ հիշատակում է Բունդեսթագում առկա վեճըՙ բանաձեւի վերնագրում ցեղասպանություն եզրաբառի վերաբերյալ ( սրա մասին հանգամանալից տես ապրիլի 3-ի «Ազգ»-ում – խմբ. )։ Գերմանիայի կառավարությանՙ եզրաբառը պատմաբանների հետազոտական եզրակացությամբ ճշգրտելու տեսակետի առիթով արտահայտվել է կառավարության հովանավորությամբ գործող Լեփսիուսհաուսի գիտական ղեկավարըՙ պատմաբան Ռոլֆ Հոսֆելդըՙ «ամնեզիա » որակելով դաշնային կառավարության վերաբերմունքը։ Այն հանգամանքը, որ 1915-ի կոտորածները ցեղասպանություն են, հայտնի է եղել դեռ կայզերական Գերմանիայի կառավարությանը, ասել է նա։ Հոսֆելդը նույն հեռուստաընկերությանը տված հարցազրույցում խոսել է Բունդեսթագի բոլոր խմբակցությունների կողմից Հայոց ցեղասպանության ճանաչման անհրաժեշտության , դպրոցական ծրագրում թեման ներառելու եւ Գերմանիայի համապատասխանատվության մասին։ Այքե Փեթերինգը ուշադրություն է բեւեռում նաեւ նախագահ Սարգսյանիՙ միջազգային լրատվամիջոցներին հյուրընկալած «Արարատի ստորոտին» վերնագրյալ հանդիպմանը հնչեցրած այն շեշտադրմանը, թե Գերմանիայի հստակ դիրքորոշումը շատ կարեւոր է։ Հայաստանի նախագահը դիմել էր Բունդեսթագի պատգամավորներին ասելովՙ Դուք ազատ եք Ձեր որոշման մեջ, իհարկե ընդգծելով, որ Գերմանիայիՙ Հայոց ցեղասպանությունը ճանաչելու Թուրքիային ուղղված կոչը ծանրակշիռ է, քանի որ Գերմանիան առերեսվել է իր անցյալինՙ ճանաչել է Հոլոքոստը։
Ապրիլի 24-ին ZDFinfo ժամը 19. 45 – ին եթեր է հեռարձակելու «Մոռացված ցեղասպանություն . Հայոց ցեղասպանության 100 տարին » վավերագրական ֆիլմը։
