15 ապրիլի – Ավստրիայի նախագահ Ֆիշերը Հայոց ցեղասպանության 100 -ամյա տարելիցի օրը Հայաստան չի գնալու, ապրիլի 15-ին հաղորդում է ավստրիական առցանց «Դի փրեսսեն»ՙ հղում անելով APA գործակալությանը։ Երեւանում Ավստրիան կներկայացնի դեսպան Ալոիս Կրաութը (Alois Kraut),նրան կընկերակցի պառլամենտական Հաննես Վենինգերը։ Ապրիլ 24-յան միջոցառումներին Երեւանում մասնակցելու հրավերը Ավստրիայի նախագահը մերժել էՙ զբաղված «ժամանակացույցից» ելնելով։ Լրատուն ներկայացնում է, որ Երեւան են այցելելու Վլադիմիր Պուտինը, ԵՄ մի շարք երկրների ղեկավարներ, Ֆրանսիայի նախագահ Ֆրանսուա Օլանդը, Հունաստանի , Կիպրոսի, Սերբիայի նախագահներըՙ հղում անելով Վիեննայում ՀՀ դեսպանության տրամադրած տեղեկատվությանը։
Այն հարցին, թե Հայաստանը հիասթափված չէ՞, որ 2012- ին Ծիծեռնակաբերդի հուշավայրում հարգանքի տուրք մատուցած Ֆիշերը Հայաստան չի գնալու, ՀՀ դեսպան Արման Կիրակոսյանը պատասխանել է. «Ամեն տարի հիշատակի միջոցառումներ կան, այս տարի 100-ամյակի առիթով դրանք ավելի առանաձնահատուկ բնույթի են։ Բնականաբար ակնկալում ենք, որ մյուս երկրները Ցեղասպանության հիշատակը արժեւորեն»։ ՀՀ դեսպանն այնուհետ ընդգծել է, թե Ավստրիայի քաղաքականությանը չեն միջամտում, հարգում են այդ երկրի լավ հարաբերությունները Թուրքիայի հետ եւ ըմբռնում, որ երկրում բնակվում են թուրքական ծագմամբ բազմաթիվ քաղաքացիներ, բայց նաեւ ցանկանում են, որ Ավստրիայի խորհրդարանը ճանաչի Հայոց ցեղասպանությունը։ Այս ճանաչումը շատ կարեւոր է նաեւ թուրքական ժխտողականության տեսակետից, նշել է դեսպան Կիրակոսյանը։ Նա շեշտել է, թե ցեղասպանության ճանաչումն առաջին հերթին իհարկե Թուրքիայից են ակնկալում ՙ դա կփոխի ամեն ինչ։ Կբացվի 1993-ից Հայաստանի հետ փակ սահմանը, դիվանագիտական հարաբերություններ կհաստատվեն, տարբեր հարթություններում համագործակցություն կսկսվիՙ հաշտեցման ուղղորդումով։
