Արմեն Մազմանյանի անվան բեմարվեստի ազգային, փորձարարական «Գոյ» կենտրոնը ԿԳՄՍ նախարարության նախագծով լուծարման եզրին է: Այդ նախագծով, «Գոյ» թատրոնի լուծարումից բացի, պլանավորվում է ստեղծագործական կազմը միավորել Գաբրիել Սունդուկյանի անվան ազգային ակադեմիական թատրոնի հետ: Լուծարման պատճառն իբրեւ թե թատրոնի ֆինանսական պլանի թերացումն է:
Թատրոնի ստեղծագործական անձնակազմն էլ, իր հերթին, նամակով դիմել է ԿԳՄՍ նախարար Ժաննա Անդրեասյանին եւ բացատրություններ պահանջել:
Այդ ամենից զատ «Գոյ» թատրոնը Ֆեյսբուքի իր պաշտոնական էջում հաղորդագրություն է տարածել՝ դիմելով գործընկերներին, ընկերներին, հանդիսատեսին ու նշել, որ թատրոնն աջակցության կարիք ունի, վերոհիշյալ պառճառներով: Սոցցանցերում նրանք օգտագործում են «Գոյամարտ» եւ «Գոյն արարելու իրավունք ունի» հեշթեգները:
«Գոյ» թատրոնը առանձին օրգանիզմ է, որն իր առջեւ գեղարվեստական հստակ խնդիրներ է դրել, դեռեւս ստեղծման օրվանից՝ համաշխարհային գեղարվեստական, փիլիսոփայական, թատերական ավանգարդ պրոցեսներ, որոնք խորհրդային եւ հետ խորհրդային թատրոնին ժամանակակից ուղղվածություն են տվել, իսկ հիմա ԿԳՄՍ-ն ուզում է լուծարել «Գոյը»: Հաջորդը ո՞ր կրթամշակութային կառույցն են լուծարելու: Իսկ միգուցե ԿԳՄՍ-ի աշխատակա՞զմը լուծարվի:
Մինչ դա, սակայն, թատրոնին աջակցելու պատրաստակամություն են հայտնել դերասան, ՀՀ վաստակավոր արտիստ Տիգրան Ներսիսյանը, կինոռեժիսոր եւ դերասան Արթուր Թումասյանը, աճպարար Վարդան Ամիրյանը, Գաբրիել Սունդուկյանի անվան ազգային ակադեմիական թատրոնի դերասան Ծովիկ Մարտիրոսյանը, երգահան Լիլիթ Բլեյանը, իտալացի աշխարահռչակ գրող-նկարիչ Տոնինո Գուեռայի կինը՝ Լորա Գուեռան (Էլեոնորա Յաբլոչկինա), դերասան ռեժիսոր Լիլի Էլբակյանը, ՀՀ ժողովրդական արտիստ Հրանտ Թոխաթյանը, գրող, դերասան՝ Վահրամ Սահակյանը, երգահան, երգիչ, գրող՝ Քրիստ Մանարյանը եւ այլք:
#Գոյն–արարելու–իրավունք–ունի
#ԳՈՅաՄԱՐՏ
ՀՐԱՉՅԱ ԳԱԼՍՏՅԱՆ
