Երիտասարդ կինոբեմադրիչ Օֆելյա Հարությունյանի «Գյուղը որ կանգնի» կինոնկարը (Բելգիա-ԱՄՆ-Ֆրանսիա) Ասուանի կանանց կինոփառատոնում (Եգիպտոս) ճանաչվել է լավագույն կարճամետրաժ խաղարկային ֆիլմ: Մինչ այդ շարժանկարը ֆրանսիական Սարտ դեպարտամենտի Լը Ման, Բուլուար եւ Արնաժ քաղաքներում կայացած կարճամետրաժ ֆիլմերի 24-րդ փառատոնում ստացել է «Ժյուրիի համակրանք» մրցանակը, իսկ Կլերմոն-Ֆերանի կարճամետրաժ շարժանկարների միջազգային փառատոնի միջազգային մրցույթում՝ ֆրանսիական հեռուստատեսության մրցանակները «Լավագույն կարճամետրաժ ֆիլմ» եւ «Լավագույն դերասան» անվանակարգերում (վերջինին արժանացել է շարժապատկերի գլխավոր դերակատարուհի Նանոր Պետրոսյանը):
«Գյուղը որ կանգնի» ֆիլմը նկարահանվել է Լոռու մարզի Մարգահովիտ գյուղում եւ պատմում է գյուղաբնակ այն կանանց մասին, որոնց ամուսինները տարիներով մնում են ռուսաստանյան «խոպաններում»: Օֆելյա Հարությունյանը նաեւ կինոնկարի բեմագրի հեղինակն է: Նանոր Պետրոսյանից բացի կինոնկարում նկարահանվել են Լիանա Վարդանյանը, Անի Խաչիկյանը, Աստղիկ Աբաջյանը եւ Սիրանուշ Բարսեղյանը:
Ա. Բ.
