«Հայաստանի ղեկավարության խղճին ենք թողնում Լեռնային Ղարաբաղի ճակատագրի պատասխանատվությունը երրորդ երկրների վրա դնելու փորձը։
Մեր կողմի բոլոր պարտավորությունները հստակ շարադրված են Ռուսաստանի, Ադրբեջանի և Հայաստանի ղեկավարների եռակողմ հայտարարության մեջ: Պարզապես պետք է բացել այս փաստաթուղթը և տեսնել, թե ինչ պարտավորություններ է կրում մեր կողմը և ինչ չի կրոմ»,- ասել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով Հայաստանի վարչապետ Նիկոլ Փաշինյանի խոսքերը, թե Ռուսաստանն է Արցախի անվտանգության երաշխավորը։
Նա հայտարարել է, որ ռուս խաղաղապահներն անում են ամեն ինչ, որպեսզի կանխեն էսկալացիան և կայունացնեն իրավիճակը։
«Հայաստանի ղեկավարության հայտարարությունները մենք համարում ենք այն քաղաքականության շարունակությունը, որն ընդունվել է 2022 թվականի հոկտեմբերին, Պրահայի գագաթնաժողովում՝ ԵՄ հովանու ներքո»,- հայտարարել է Զախարովան։
Զախարովան անդրադարձել է Փաշինյանի այն հայտարարությանը, թե Ռուսաստանն ինքը պետք է դիմի ՄԱԿ-ի Անվտանգության խորհրդին, եթե չի կարող երաշխավորել Արցախի անվտանգությունը.
«Սա, գիտեք, կարելի է գնահատել միայն մեկ բառով՝ շրջադարձային հրաշքներ, այլ սահմանում չեմ կարող տալ, չեմ էլ փորձի վերլուծել և ինչ-որ եզրակացության հանգել»,- ասել է ՌԴ ԱԳՆ պաշտոնական ներկայացուցիչը։
Զախարովան չի պատասխանել՝ Ռուսաստանը կմիջամտի՞ Արցախի դեմ Ադրբեջանի ագրեսիայի դեպքում։
