ՌԴ-ն պիտի անհապաղ դուրս բերի զինուժը Ուկրաինայից: Նաեւ՝ Ղրիմի՞ց
Երեկ ՄԱԿ-ի գլխավոր ասամբլեայում Ուկրաինայի (ԵՄ-ի հետ համատեղ) առաջարկած խաղաղության բանաձեւի քվեարկության արդյունքը հայտնի դարձավ ուշ երեկոյան: 141 կողմ, 7 դեմ, 32 ձեռնպահ: Անկախ արդյունքից, այն խորհրդանշական ազդանշան է՝ 2022-ի փետրվարի 24-ին Ռուսաստանի Ուկրաինայի վրա հարձակումը չենք մոռանում: Սա Ուկրաինայի հարցով միակ բանաձեւը չէ, 2022-ի մարտին՝ առաջինն էր, իսկ հոկտեմբերին 193-ից 143 պետություն դատապարտեց ՌԴ-ի ներխուժումը: Սա թվով 6-րդն է: Դեմ են քվեարկել Բելառուսը, Հյուսիսային Կորեան, Էրիթրեան, Մալին, Նիկարագուան, Սիրիան եւ Ռուսաստանը: Ձեռնպահ են մնացել Չինաստանն ու Հնդկաստանը, որ միասին 2,8 միլիարդ բնակիչ ունեն: Բրազիլիան, Թուրքիան, Սաուդյան Արաբիան կողմ են քվեարկել բանաձեւին, Հարավային Աֆրիկան եւ Իրանը՝ ձեռնպահ: Հայաստանը նույնպես ձեռնպահ է քվեարկել, Վրաստանը՝ կողմ, իսկ Ադրբեջանը նախընտրել է չմասնակցել:
Երեկվա բանաձեւը նախորդներից տարբերվում է ձեւակերպումներով: Մասնավորապես նախկինում ՌԴ-ին դատապարտող շեշտադրման փոխարեն առանցքային բառ է ընտրվել խաղաղությունը: ԳԴՀ արտգործնախարարի հուշմամբ, իսկ նպատակը՝ որ քվեարկության մասնակից երկրներն առավել շատ «կողմ» ձայն ապահովեն: «Խաղաղություն» բառն ընդունելի կլինի «հավաքական հարավի» համար:
Այս բանաձեւով ՌԴ-ն պիտի դուրս բերի զինուժը Ուկրաինայի տարածքից: «Նա՞եւ Ղրիմից» Նյու Յորքում Գերմանիայի արտգործնախարար Բերբոքին հարց ուղղեց ARD-ի լրատվական «Օրվա թեմա» գլխավոր թողարկման մոդերատոր Միոզկան՝ ակնարկելով նոր էսկալացիայի վտանգը: Բերբոքը խուսափեց հստակ պատասխան տալ, երկու անգամ հնչեց հարցը, բայց խաղաղության պահանջ հնչեցնող ԳԴՀ արտգործնախարարը նախընտրեց դիվանագիտական ոչինչ չբացահայտող լեզուն:
Իրազեկենք, որ ՄԱԿ-ի բանաձեւը իրավական պարտադրանք չունի:
Անահիտ Հովսեփյան, Գերմանիա
