Յուրաքանչյուր հարյուրամյակում տեղի է ունենում «համակարգային պատերազմ», եւ 21-րդ դարը բացառություն չի կազմի: Այդ մասին «Բիզնես ինսայդեր» պարբերականին տված հարցազրույցում ասել է Stratfor վերլուծական ընկերության հիմնադիր Ջորջ Ֆրիդմանը: Նշանավոր փորձագետը կանխատեսել է, որ պատերազմներ կբորբոքվեն Արեւելյան Եվրոպայում եւ Մերձավոր Արեւելքում: Բացի դրանից, սպասվում է ԱՄՆ-ի եւ Ճապոնիայի ծովային պատերազմ:
Ներկայումս բավական հաճախ (Սիրիա, Արեւելյան Ուկրաինա) կարելի է տեսնել այսպիսի սցենար. ոչ պետական խմբավորումները ուրիշ պետության աջակցությամբ մարտնչում են տվյալ երկրի իշխանությունների դեմ: Սակայն երկու պետության լիամասշտաբ ցամաքային պատերազմի օրինակ գտնելու համար արժե վերադառնալ 2003 թվականՙ ԱՄՆ-ի Իրաք ներխուժելու տարի, պնդում է «Բիզնես ինսայդերը»:
Երկու աշխարհամարտերը իրենց ընդգրկմամբ դարձան աղետալի ապացույցները միջազգային այն համակարգի անկայունության, որը թույլատրում էր միջպետական վեճեր լուծելիս ռազմական գործողություններ մղել իբրեւ արտաքին քաղաքականության օրինական միջոց, եւ ոչ թե իբրեւ ծայրահեղ միջոց: Երկրորդ աշխարհամարտի ավարտից հետո տարբեր պետությունների քաղաքական եւ իրավաբանական համակարգերը կառուցվում էին պատերազմների կանխման գաղափարի շուրջը, սակայն իրավիճակի փոփոխությունը չի բացառվում, նշում է «Բիզնես ինսայդերը»:
Այս թեմայով պարբերականին տված հարցազրույցում Stratfor-ի հիմնադիր Ջորջ Ֆրիդմանը նախազգուշացրել է, որ վերստին կարող է արդիական դառնալ համաշխարհային քաղաքականության մի այնպիսի բնութագիր, ինչպիսին են միջպետական ռազմական գործողությունները: Ֆրիդմանը նշել է, որ պատմության մեջ անցյալում եւս եղել են ժամանակաշրջաններ, երբ վերլուծաբանները սխալմամբ կարծել են, թե երկրներն այլեւս երբեք չեն պատերազմի իրար դեմ: Փորձագետը ընդգծել է, որ յուրաքանչյուր հարյուրամյակում տեղի է ունեցել «համակարգային պատերազմ», որի ընթացքում ամբողջ համակարգը «ցնցվել է ջղակծկումների մեջ»:
Ըստ Ֆրիդմանի վերլուծության, յուրաքանչյուր միջազգային համակարգում առկա են սեփական «ճակատագրական թերություններ»: Նրա խոսքերով, ներկայիս համակարգը պարունակում է ինքնաոչնչացման սաղմեր: «Երբ Գերմանիայի, Չինաստանի եւ Ռուսաստանի նման երկրները անկում են ապրում, եւ նրանց տեղում հայտնվում են ուրիշները, հենց այդ ժամանակ սկսվում են համակարգային պատերազմները: Այդ ժամանակ ծագում է վտանգ, քանզի այդ երկրները դեռ չեն հասել զուգակշռության… այնպես որ հիմա մենք տեսնում ենք համակարգային փոփոխություններ: Պատրաստվեք պատերազմի», ասել է Ֆրիդմանը:
Նրա խոսքերով, ամենայն հավանականությամբ առաջին պլանում կհայտնվեն Ճապոնիան, Թուրքիան եւ Լեհաստանը: Ուստի պատերազմներ կբորբոքվեն Արեւելյան Եվրոպայում, Մերձավոր Արեւելքում: Բացի դրանից, ԱՄՆ-ին սպասում է ծովային պատերազմ Ճապոնիայի դեմ: «Ամեն անգամ, երբ ի հայտ են գալիս նոր տերություններ, նրանք ուզում են գտնել սեփական զուգակշռություն: Նոր պետություններն ուժեղանում են, հներն անկում են ապրում: Վտանգավոր է ոչ թե բուն գործընթացը, այլ նոր մակարդակի անցնող երկրի դիրքորոշումը», գտնում է Stratfor-ի հիմնադիրն ու ղեկավարը:
