Ֆրանսիայի նախագահ Էմանուել Մակրոնը հունվարի 23-ին, Ելիսեյան պալատում հանդիպել է Ֆրանսիայի հայկական կազմակերպությունների համակարգող խորհրդի համանախագահներ Արա Թորանյանի և Մուրադ Փափազյանի հետ։
Այդ մասին հայտնում է Ֆրանսիայի հայկական կազմակերպությունների համակարգող խորհրդի մամուլի ծառայությունը։
Ֆրանսիայի հայ համայնքի ներկայացուցիչները Ֆրանսիայի նախագահի հետ քննարկել են 2022 թվականի դեկտեմբերի 12-ից Լաչինի միջանցքի փակման հետևանքով Արցախում առաջացած իրավիճակը և Հայաստանի տարածքային ամբողջականությանը սպառնացող սպառնալիքները։
Համանախագահները ողջունել են Էմանուել Մակրոնի կողմից իրենց ցուցաբերած ուշադրությունը և հույս հայտնել, որ Ֆրանսիան գնալով կմեծացնի իր ակտիվ դերակատարումը Արցախի բնակչության պաշտպանության պատասխանատվության հարցում։
Հիշեցնենք, որ Ֆրանսիայի հայկական կազմակերպությունների համակարգող խորհրդի համանախագահ Մուրադ Փափազյանի մուտքը Հայաստան 2022 թվականի ամառվանից արգելված է։ Պատճառը Նիկոլ Փաշինյանի՝ Ֆրանսիա կատարած այցի ժամանակ նրա դեմ կազմակերպված բողոքի ակցիան է։ ՀՀ վարչապետի աշխատակազմի տեղեկատվության և հասարակայնության հետ կապերի վարչությունը պարզաբանել էր, որ Մուրադ Փափազյանը «ՀՀ պետական դրոշակիր ավտոշարասյան դեմ հարձակում կազմակերպած անձանցից մեկն է եղել»։
