Ծխելու հետ կապված վնասները համաշխարհային տնտեսության մեջ կազմում են տարեկան ավելի քան 1 տրիլիոն դոլար: Աշխարհի երկրները ամեն տարի այդքան ծախս են անումՙ կապված առողջապահության եւ աշխատանքի արտադրողականության կորուստների հետ: Այդ են վկայում Առողջապահության համաշխարհային կազմակերպության (ԱՀԿ) եւ ԱՄՆ ուռուցքաբանության ազգային ինստիտուտի անցկացրած հետազոտության տվյալները, հաղորդում է Ռոյթեր գործակալությունը:
Հետազոտության արդյունքներին վերաբերող զեկուցագրում նշվում է, որ մինչեւ 2030 թվականը ծխելու առաջացրած հիվանդությունների հետեւանքով մահացությունների թիվը կավելանա մեկ երրորդով: Փաստաթղթի հեղինակների կարծիքով, մինչեւ 2030 թվականը ծխելու հետ կապված մահացությունների թիվը տարեկան 6-ից կհասնի 8 միլիոնի: «Ըստ որում, դեպքերի ավելի քան 80 տոկոսը տեղի կունենա եկամտի ցածր եւ միջին մակարդակ ունեցող երկրներում», ասվում է հաղորդման մեջ:
Զեկուցագրում նաեւ նշվում է, որ աշխարհի բնակչության մեջ ծխելու տարածվածությունը նվազել է, սակայն «ծխողների ընդհանուր թիվն աշխարհում շարունակում է աճել»:
Աշխարհի մի շարք երկրներում գործում են «հակածխախոտային» օրենքներ: Մասնավորապես Ռուսաստանում 2013 թ. ընդունված օրենքն արգելում է ծխել մարզադաշտերում, դպրոցներում, բուհերում, հիվանդանոցներում, մանկական խաղահրապարակներում, խանութներում, վերելակներում, օդանավերում եւ բենզալցակայաններում: Բացի դրանից, երկրում արգելված է ծխախոտի գովազդը: 2014 թ. հունիսի 1-ից ՌԴ-ում արգելված է ծխել գնացքներում, կայարաններում եւ օդանավակայաններում, հյուրանոցներում, սրճարաններում եւ անգամ ռեստորաններում:
