Լիսաբոնում տեղակայված եւ գործող Գալուստ Գյուլբենկյան հիմնարկությունը հայտարարել է, որ պատրաստ է 622 միլիոն դոլարով Թաիլանդի «PTT Exploration and Production» ընկերությանը վաճառել իր «Partex» էներգետիկ հոլդինգը:
«Գործարքը նպատակ ունի վերաձեւավորելու հիմնադրամի բազային ակտիվները, որոնք հիմնականում պետք է ապահովեն երկարաժամկետ նպաստավոր ներդրումներ», նշել է այդ առթիվ հիմնարկության հոգաբարձուների խորհրդի նախագահ Իզաբել Մոտան :
«Partexը», ըստ ստացված հաղորդագրության, ներկայիս հինգ երկրներում (հիմնականում Օմանում եւ Արաբական Միացյալ Էմիրություններում) ներդրումներ է իրականացնում յոթ նավթային եւ գազային ծրագրերում:
«Գործարքը մասնավորապես Թաիլանդի ընկերությանը հնարավորություն է տալու դառնալու Օմանի ամենամեծ նավթահանքի կոնսորցիումի անդամ եւ մեծացնելու հետագայում ներդրումների հնարավորությունները Մերձավոր Արեւելքում», արձագանքել են Թաիլանդում: Դրանով PTTEP-ն 16.000 բարել նավթ է կարողանալու հավելյալ արտադրել օրական:
Գործարքը նախատեսված է ավարտել մինչեւ այս տարվա վերջ: Գալուստ Գյուլբենկյան հիմնարկությանը որպես ֆինանսական խորհրդատու գործում է «Gefferies International Limited» ընկերությունը:
Ավելացնենք, որ Գալուստ Գյուլբենկյանը (1869-1955), որ աշխարհում ծանոթ է որպես «Պարոն 5 տոկոս», Պորտուգալիա էր տեղափոխվել 1942-ին: «Partex-ը» հիմնարկությանն է պատկանել ավելի քան 60 տարի:
