Կառավարությունն իր այսօրվա՝ հուլիսի 14-ի նիստում երկու անձի ազատեց պարտադիր զինծառայությունից՝ Նարեկ Արմենի Սուքիասյանին եւ Էրիկ Գեւորգի Վարդանյանին:
Որոշումների հիմնվորումներում, մասնավորապես, նշվում է, որ այդ որոշումների անհրաժեշտությունը պայմանավորված է նրանց գիտական գործունեության ընթացքում ձեռք բերված գիտելիքների ընդլայնմանը և նոր գիտե¬լիք¬ների ստացմանն ու կիրառմանն ուղղված մտավոր ստեղծագործական գործունեու¬թյունը շարունակելու հնարավորության ընձեռնմամբ:
26-ամյա Նարեկ Սուքիասյանը 2012-2013 թթ․ արժանացել է FLEX ամերիկյան փոխանակման ծրագրի կրթաթոշակի և մեկ ուսումնական տարի սովորել ԱՄՆ Նյու Յորքի Նահանգի Սեքեթս Հարբոր կենտրոնական դպրոցում։ 2015-2018 թթ․ սովորել և գրազանցությամբ ավարտել է է Ռումինիայի Բաբեշ-Բոյոյ համալսարանի Եվրոպագիտության ֆակուլտետի Միջազգային հարաբերություններ և Եվրոպագիտություն բակալավրի ծրագիրը։ 2018-2020 թթ․ սովորել և գերազանցությամբ ավարտել է ԵՊՀ Միջազգային հարաբերությունների ֆակուլտետը:
Ներկայումս նա աշխատում է ԵՊՀ Հայագիտական հետազոտությունների ինստիտուտի Քաղաքակրթական և մշակութային հետազոտությունների բաժնում՝ որպես կրտսեր գիտաշխատող և Ֆրիդրիխ Էբերտ հիմնադրամում՝ որպես հետազոտող։ Ն․Սուքիասյանը դասավանդում է Հարավային Կալիֆորնիայի համալսարանի Հայագիտական հետազոտությունների ինստիտուտի Հետազոտական մեթոդների աշխատաժողովներում։
Ն․ Սուքիասյանը որպես երիտասարդ գիտնական ունի տպագրված 12 գիտական հոդված։ 2022թ․-ի ապրիլի 7-ին կայացել է Նարեկ Սուքիասյանի ատենախոսության պաշտպանությունը, եւ նրան շնորհվել է քաղաքական գիտությունների թեկնածուի գիտական աստիճան:
27-ամյա Էրիկ Գևորգի Վարդանյանը 2020 թվականից առ այսօր աշխատում է «Հովարդ Կարագյոզյան» բժշկական բարեգործական ՀԿ-ում, որպես շինարարության գծով փոխտնօրեն, որտեղ ղեկավարում է կազմակերպության նոր կենտրոնների նախագծման և կառուցման աշխատանքները։
Ընդհանուր առմամբ 2017-2021 թվականներին տպագրել է ընդհանուր առմամբ 9 գիտական հոդվածներ։ 2022 թվականի փետրվարի 10-ին ստացել է ճարտարապետության թեկնածուի գիտական աստիճան։
