Ազգային անվտանգության ծառայությունում քիչ առաջ ավարտվեց 44-օրյա պատերազմում զոհված զինծառայող Արման Ազատյանի հոր՝ Վիգեն Ազատյանի, բացատրություն տալը։
Նշենք, որ զոհված զինծառայողի հայրը հրավիրվել էր ԱԱԾ՝ մայիսի 20-ին Քննչական կոմիտեի նախագահ Արգիշտի Քյարամյանի հետ հանդիպման ժամանակ տեղի ունեցած միջադեպի առնչությամբ բացատրություն տալու։
NEWS.am-ի հետ զրույցում Վիգեն Ազատյանն ասել է, որ ավելի քան 4 ժամ տեւած բացատրությունից մանրամասներ չի կարող հայտնել, բայց բոլոր հարցերին մանրամասն պատասխանել է. «Քյարամյանի պահվածքը նման էր ոչ համապատասխան դիրք ունեցող մարդու, փողոցային վիճակներ էր։ Այդ ամենը ներկայացված է մեր միջնորդության մեջ։ Մենք միջնորդել ենք, որ Քյարամյանի դեմ հարուցվի քրեական գործ»։
Անդրադառնալով Քննչական կոմիտեի կողմից արված այսօրվա հայտարարությանը՝ զոհված զինծառայողի հայրն ասաց. «Մենք Քննչական կոմիտեի հայտարարությանը սպասում էինք երեկ, բայց երեւի չեն հասցրել, էսօր են ասում։ Դե հասկացան, որ նահանջը մերը չի»։
Հիշեցնենք, որ զոհված զինծառայողների հարազատները հայտարարել էին, որ այդ հանդիպման ժամանակ Քյարամյանը իրենց վրա մատ է թափ տվել, վիրավորել է, իրավիճակը լարվել է, միջամտել են Քյարամյանի անվտանգության աշխատակիցները: Ծնողները նաեւ դատախազությանը 5 օր ժամանակ էին տվել, որպեսզի իրենց հաղորդման հիման վրա հարուցված քրեական գործը քննչական կոմիտեից տեղափոխվի ԱԱԾ:
Ուշագրավ է, որ այսօր, երբ լրանում է հնգօրյա ժամկետը քննչական կոմիտեն որոշել է վերջապես հանդես գալ Քյարամյանի հետ միջադեպի առնչությամբ պարզաբանումով: Քննչական կոմիտեն վստահեցրել է, որ այդ միջադեպի ժամանակ քաշքշուք չի եղել, վիրավորանքներ չեն հնչել: Ըստ պարզաբանման՝ հանդիպումը մեկնարկել է Քյարամյանի խոսքով, որին հաջորդած հարցուպատասխանի ժամանակ ծնողներից մեկը բուռն է արձագանքել:Հարազատներից մեկն էլ միջամտել է, ինչից հետո կոմիտեի նախագահը փորձել է պարզել, թե ինչ նպատակ է ունեցել այդ միջամտությունը: Քննչական կոմիտեն սա որակել է որպես ակնհայտ սադրանք զոհվածի հարազատի կողմից:
