20-30 տարի անց Երեւանի բնակարանային ֆոնդի մեծ մասը կլինի 100 տարեկան: Մեկդարյա կյանք տեսած շենքերը ոչ միայն ֆիզակապես, այլ նաեւ բարոյապես են մաշվել: Բնակֆոնդի թարմացման ռազմավարություն, բնական է, ներկա կամ նախկին իշխանությունները չեն ներկայացրել ու անգամ չունեն: Պատճառն առավել քան հստակ է՝ Երեւանում բնակարանաշինությունը բացառապես բիզնես բնույթ է կրում, քաղաքապետարանը շինթույլտվություն է տրամադրում ոչ թե ըստ ռազմավարության, պլանի, որ կարող էր հաստատված լինել ճարտարապետների, ժողովրդագրագետների ու այլ մասնագետների կողմից, այլ ըստ հայկական ավանդական մեթոդի:
Օրեր առաջ Հայաստանում 5 մագնիտուդ ուժգնությամբ գրանցված երկրաշարժն ավելի շատ սոցիալական ցանցերում, քան թե պատկան մարմիների, մասնագետների ու ղեկավարների կողմից քննարկվեց: Ինչպես բոլոր հարցերում, այս հարցի դեպքում նույնպես Facebook-ում ասացին, խոսեցին, կատակեցին, ահաբեկվեցին, գրեցին ու ջնջեցին, ու ամեն ինչ անցավ-գնաց: Սարկազմով ու հումորով, մտահոգությամբ ու փլատակների տակ մնալու վախով համեմված գրառումներից անդին սակայն վերոնշյալ հարցերն այլ հարթակներում չքննարկվեցին ու, ըստ երեւութին, չեն էլ քննարկվի:
Ու մինչ արտակարգ իրավիճակների նախարարությունը ՀՀ քաղաքացիներին հանդարտության ու չահաբեկվելու կոչ է անում, մեր հայրենակիցներն էլ շարունակում են սոցցանցային խրախճանքը, Հայաստանում տասը հազար մարդ շարունակում է ավելի քան 200 վթարային շենքերում բնակվել:
