Day:Օգոստոսի 27, 2021

«Առավոտ» օրաթերթը գրում է. «Ադրբեջանցի զինծառայողները  Սյունիքում փակել են մեր ամենակարեւոր միջպետական ճանապարհը: Այդ առիթով վարչապետ Փաշինյանը խորհրդարանում նշեց, որ հարցի շուրջ գնում են բանակցություններ, բայց  դեպի Կապան սարերով կան այլ ճանապարհներ: Եվ այդ հպանցիկ անդրադարձից հետո քննարկումն ԱԺ-ում գնաց սովորական սցենարով՝ «բա որ ձեր ժամանակ այսինչը արեցիք կամ այնինչը չարեցիք»:

Ընդդիմությունն էլ կուլ է գնում այդ օրակարգին, եւ երկու կողմերն էլ շատ արագ շեղվեցին իրենց սիրած թեմաների վրա: Ամբողջ խնդիրն այն է, որ եթե անգամ 5, 10 կամ 20 տարվա իրադարձություններն են այսօրվա իրավիճակի պատճառը, դա չի չեղարկում այն փաստը, որ Հայաստանի միջպետական ճանապարհը վերահսկվում է հակառակորդի կողմից, ինչը, բնականաբար, լուրջ հարված է թե՛ մեր տնտեսությանը (չմոռանանք նաեւ, որ այդ ճանապարհով Հայաստանը կապվում է Իրանի հետ) եւ թե՛ այնտեղ ապրող մարդկանց շահերին: Դա նաեւ ապացույցն է այն իրողության,  որ Հայաստանի զինված ուժերը, որքան էլ բուռն բարեփոխումների շրջան ապրեն, որեւէ դիմադրություն ցույց չեն տալիս թշնամու ագրեսիվ գործողություններին: Բայց պետք է արձանագրենք նաեւ, որ այդ արտառոց իրավիճակը չի հուզում մեր քաղաքացիների մեծամասնությանը:

Օրինակ, Սյունիքի մարզի բնակիչները, որոնց կյանքը վտանգի տակ է եւ որոնք անմիջապես տուժում են ներքին շրջափակումից, չեն գալիս Երեւան կառավարության շենքի մոտ ու չեն պահանջում լուծել խնդիրը: Գուցե իրոք մտածում են, որ այստեղ մեղքն ամբողջությամբ «նախկին իշխանությանն» է: Գուցե վերջնականապես հիասթափվել են եւ կամաց-կամաց հավաքում են իրենց ճամպրուկները:

Թերեւս, ճիշտ էլ անում են, որ չեն բողոքում. թե չէ իշխանությունները կկասկածեն որեւէ համայնքապետի՝ ցույցը կազմակերպելու մեջ եւ նրա դեմ գործ կսարքեն: Եթե այդ մարդիկ (ասենք, Կապանի բնակիչները) չեն բողոքում, ապա մնացած զանգվածից դժվար է ակնկալել, որ նրանք շատ հուզվեն: Չեմ նկատել այդպիսի բան: Դրանից ես կարող եմ եզրակացնել, որ ավելի քան 600 հազար քաղաքացի, հունիսի 20-ին իրենց ընտրությունը կատարելով, իշխանությանը մանդատ է տվել նաեւ այդ միջպետական ճանապարհը ադրբեջանցիներին հանձնելու: Հենց այդ պատճառով է, որ ո՛չ խորհրդարանում, ո՛չ էլ այլ հարթակներում այդ խնդիրը լրջորեն չի քննարկվում: Քաղաքացիներն իրենց ընտրությունը կատարել են:

Ի դեպ, ի՞նչ եղավ պաշտպանության նախարարը, որը հրամայել էր կրակել մեր սահմանն անցնող ադրբեջանցի զինծառայողների վրա:

Ազգային ժողոովում կառավարության ծրագրի իմ ներկայացման հիմնական ասելիքը տարածաշրջանի եւ Հայաստանի համար խաղաղ զարգացման դարաշրջան բացելու օրակարգն էր, եւ սրանից հետո առաջացավ արդեն հայտնի իրադրությունը, երբ Ադրբեջանը Էյվազլի եւ Չայզամի հատվածներում փակել է Սյունիքի մարզի հարավային հատվածներ տանող հիմնական ճանապարհը։ Այս մասին այսօր՝ օգոստոսի 27-ին, Կառավարության հերթական նիստին ասաց ՀՀ վարչապետ Նիկոլ Փաշինյանը։

Ըստ նրա՝ այս գործողությունը հակասում է 2020 թվականին ձեռք բերված պայմանավորվածություններին. «Ես հույս ունեմ, որ իրավիճակը րոպե առաջ կկարգավորվի։ Քաղաքական առումով ինձ համար միանշանակ է, որ այդ ակցիան արվել է մեր առաջ քաշած խաղաղության օրակարգին հարվածելու, այդ օրակարգը վարկաբեկելու համար։ Ադրբեջանի պահվածքը վկայում է, որ նման միջադեպեր էլի կարող են լինել։ Մեր ծառայությունները պետք է զգոն լինեն եւ ուշադիր, բայց մյուս կողմից մեզ ամուր  նյարդեր են պետք, եւ մենք մեր ռազմավարական գիծը, խաղաղության օրակարգը պիտի զարգացնենք, առաջ տանենք։ Սյունիքի  ճանապարհների հետ կապված իրադրության ստեղծումը մեզ համար անկանխատեսելի չէր, եւ մենք այդ ընթացքում աշխատել ենք նոր ենթակառուցվածքների ձեւավորման ուղղությամբ ու շարունակելու ենք աշխատել։ Սակայն Էյվազլի եւ Չայզամի հատվածներում ճանապարհի վերաբացումը տարածաշրջանային կայունության շատ լավ խորհրդանիշ կարող է դառնալ։ Ադրբեջանական կողմը պնդում է, որ ստեղծված իրադրությունը կապվում է նախորդ օրը տեղի ունեցած միջադեպի հետ, երբ դանակահարվել է Ադրբեջանի սահմանապահ զորքերի ծառայող։ Մեր նախնական ստուգումները ցույց են տվել, որ հայկական կողմը որեւէ առնչություն չունի ենթադրվող միջադեպի հետ։ Պատրաստ ենք նաեւ համատեղ հետաքննության Հայաստանի, Ռուսաստանի, Ադրբեջանի ներկայացուցիչների մասնակցությամբ»։

Անդրադառնալով միջպետական եւ հանրապետական նշանակության ճանապարհների նորոգման հարցին՝ Փաշինյանն ասաց. «Հիմնանորոգման մեր ծրագրերը, մասնավորապես, Սյունիքի մարզում մինչեւ տարեվերջ Տաթեւ-Աղվանի ճանապարհի հիմնանորոգումը պիտի ավարտվի։ Նախանշված մյուս հատվածների ճանապարհաշինական ծրագրերը նույնպես պիտի ավարտենք, համայնքների անխափան կապը մարզկենտրոնի, միջպետական եւ հանրապետական նշանակության ճանապարհների հետ ավելի որակյալ դարձնելու համար»։

Ըստ Փաշինյանի՝ որոշակի դրական հրապարակային ազդակներ կան Թուրքիայի կողմից. «Մենք այդ ազդակները կգնահատենք եւ դրական ազդակներին դրական ազդակով կպատասխանենք»։

News.am

Խնդրում ենք եւս մեկ անգամ՝ նորից դառնալ զինվոր, նորից ընդգրկվել հայրենիքի պաշտպանությանը, նորից լավ սովորել, ինչպես արել եք նախորդ ծառայության  ժամանակ, նորից սովորեք զենք բռնելը եւ ձեր ներկայությունն այստեղ հիմք է հանդիսանում, որ մեր խաղաղությունը լինի ամուր ձեռքերում եւ մեր երկիրը լինի պաշտպանված։ Այս մասին ինչպես հաղորդում է «Զինուժը» օգոստոսի 26–ին, եռամսյա վարժական հավաքների մասնակիցների հետ հանդիպմանն՝ ասել է Պաշտպանության նախարար Արշակ Կարապետյանը։

Պաշտպանության նախարարը նշել է՝ առավելագույնն է արվելու, որ հավաքների մասնակիցները լիարժեք ներգրավվեն զորամասի առօրյային եւ մարտական պատրաստության միջոցառումներին։

Նախարարը վստահեցրել է, որ Կառավարության կողմից ամեն ինչ է արվելու, որպեսզի  հավաքի մասնակիցների սոցիալական խնդիրները լուծվեն։ Արշակ Կարապետյանն անձամբ է համտեսել հավաքի մասնակիցների համար նախատեսված ճաշատեսակները. «Փորձեցի, իմ դուրն էլ եկավ»։

 Նախարարը տեղում ծանոթացել է հավաքի մասնակիցների կենցաղ–կացարանային պայմաններին։ Նա հանձնարարել է առավելագույնն անել սնունդն ու կացարանային պատշաճ պայմաններ  ապահովելու համար։

Ապա Կարապետյանն այցելել է նորաստեղծ հատուկ զորամիավորում, որի ղեկավար ու ենթակա կազմին է ներկայացրել նորանշանակ հրամանատար, գեներալ–մայոր Արտակ Բուդաղյանին։

Նախարարը գոհունակություն է հայտնել  քաղաքացիների՝  եռամսյա հավաքի մասնակցությունից։

«Բավականին լավ ներկայացել են զինկոմիսարիատներ, ոչ մի տեղ ոչ մի խոչընդոտ չի եղել. աա մեզ պարտավորեցնում է։ Այս երեք ամիսն օգտագործեք էֆեկտիվ, այդ մարդիկ պատրաստ են սովորել»,– ասել է նախարարը։

Անհետ կորածների հարազատները օգոստոսի 26-ի երեկոյան հավաքվել էին Կառավարության շենքի դիմաց։ Նրանք այնտեղ են գիշերել ու բողոքի ակցիան շարունակում են նաև հիմա։ Պահանջում են հանդիպում Նիկոլ Փաշինյանի հետ։ Անհետ կորածների հարազատները հրաժարվում են ընդունել ԴՆԹ հետազոտության արդյունքները։