Երևանի նորընտիր քաղաքապետ Տիգրան Ավինյանի երդմնակալության արարողությանը լրագրողների մուտքն արգելելը շատ վատ նախադեպ է, որը խոսում է այն մասին, թե ինչպիսի գործելաոճով է փորձելու աշխատել քաղաքապետարանը։ Azg.am-ի թղթակցի հետ զրույցում նման տեսակետ հայտնեց Երևանի մամուլի ակումբի նախագահ Բորիս Նավասարդյանը։
«Բնականաբար, այս գործելաոճն ընդունելի չէ, և պետք է դիմել բոլոր քայլերին, որպեսզի քաղաքային իշխանությունները հրաժարվեն անընդունելի միտումներից։ Կարծում եմ՝ լրագրողների մուտքի արգելքը ցուցիչ է, թե ինչպիսի մտադրություններ կան քաղաքի ղեկավարության մոտ»,- ասաց նա։
Ըստ Երևանի մամուլի ակումբի նախագահի՝ իշխանությունները նման քայլի դիմում են, երբ այդքան էլ վստահ չեն իրենց պոպուլյարության վրա և ցանկանում են խուսափել անհարմար իրավիճակներից, անհարկի շփումներից, սուր հարցերից և քննադատություններից։ Այդ կերպ նրանք փորձում են իրենց գործառույթներն իրականացնել՝ առանց հաշվի առնելու հասարակության արձագանքը, մինչդեռ բոլորը շատ լավ հասկանում են, որ լրագրողներն իրենց գործառույթով հասարակության ներկայացուցիչներ են։
Բորիս Նավասարդյանը միաժամանակ հիշեցրեց, որ մի քանի տարի առաջ ևս այս խնդիրը բարձրացվել է և միայն տևական քննարկումների արդյունքում է լուծում ստացել։
«Այն ժամանակ էլ ցանկանում էին, որ լրագրողները չկարողանան մուտք գործել ավագանու նիստերի դահլիճ և նիստին հետևեն էկրանից։ Մեր մասնակցությամբ քաղաքապետարանի ղեկավարության հետ բավական երկար բանակցություններ եղան, և ի վերջո լրագրողները կարողացան պնդել իրենց իրավունքները՝ ներկա գտնվելու ավագանու նիստերին։
Այն ժամանակ ևս որպես փաստարկ բերվում էր դահլիճի սահմանափակ տարածքը, բայց երբ պետք եղավ, լուծումներ գտնվեցին։ Հիմա, փաստորեն, նույն փաստարկները «վերակենդանցվում են», և այստեղ ակնհայտորեն միտում կա հասարակությունից մեկուսացնելու Երևանի ավագանու աշխատանքները»,- նկատեց Երևանի մամուլի ակումբի նախագահը։
Վերջում Բորիս Նավասարսյանը հավաստիացրեց, որ լրագրողների մուտքը Երևանի քաղաքապետարան արգելելու հարցը լինելու է իր և գործընկեր կազմակերպությունների ուշադրության կենտրոնում։
«Ավելի ուշ հանդես կգանք հայտարարությամբ և հետո կմտնենք անհրաժեշտ երկխոսության մեջ՝ ունենալով շատ ծանրակշիռ փաստարկներ»,- ասաց Երևանի մամուլի ակումբի նախագահը։
Հիշեցնենք, որ այսօր Երևանի քաղաքապետարանի շենքում տեղի է ունեցել նորընտիր քաղաքապետ Տիգրան Ավինյանի երդմնակալության արարողությունը։ Վերջինս, կարմիր գորգի վրա դիմավորելով և ներս հրավիրելով հյուրերին, լրագրողների բողոքներին ի պատասխան՝ նշել է, որ ԶԼՄ ներկայացուցիչները կարող են մոտենալ միայն ժամը 12:00-ին, այնուհետև չարձագանքելով լրագրողների հարցադրումներին՝ հեռացել։
Հատկանշական է, որ նախկինում երբևէ լրագրողների մուտքը քաղաքապետարնի շենք չի արգելվել, և ԶԼՄ-ների ներկայացուցիչներն անարգել մուտքի թույլտվություն են ունեցել տվյալ շենք։
