Երևանի ավագանու «Մայր Հայաստան» խմբակցության անդամ Զարուհի Փոստանջյանն օգտվում է հանրային տրանսպորտից և ամենօրյան ակտիվ տեղաշարժի պայմաններում՝ անգամ 100 դրամ ուղեվարձի պարագայում, օրական երբեմն ստիպված է լինում հասարակական տրամսպորտի վրա 1000 դրամ և ավելի գումար ծախսել։
«Այնպես չէ, որ 100 դրամ ուղեվարձն էժան կամ մատչելի Է։ Հայաստանի Հանրապետությունում նվազագույն աշխատավարձը 75 հազար դրամ է։ Եթե դրանից հանենք տրանսպորտին հատկացվող 30-35 հազար դրամը, կմնա 40-45 հազար դրամ։ Այսինքն՝ եթե ես հասարակական տրանսպորտից ակտիվ օգտվող քաղաքացի եմ՝ գումարած իմ դպրոցական և ուսանող երկու երեխաները, ամսական պետք է առնվազն 70-80 հազար տրանսպորտի գումար առանձնացնենք»,-Azg.am-ի թղթակցի հետ զրույցում ասաց Զարուհի Փոստանջյանը՝ ընդգծելով, որ տրանսպորտի ուղեվարձի թանկացումից հետո ընտանեկան բյուջեից այդ նպատակով տրամադրվելիք գումարը կրկնապատկվելու է։
Ըստ ավագանու անդամի՝ Երևանի քաղաքապետարանը, փոխարենը հատուկ խմբերի քաղաքացիների՝ դպրոցականների, ուսանողների, կենսաթոշակառուների և մյուսների համար հասարակական տրանսպորտով երթևեկելու արտոնություններ սահմանի, հակառակը՝ համահարթ մոտեցում է ցուցաբերում։
Զարուհի Փոստանջյանի խոսքով՝ հանրային տրանսպորտը համայնքային ծառայություն է, ոչ թե օծանելիք արտադրող ընկերություն, որը ցանկացած պահի կարող է թանկացնել իր արտադրանքը։
«Այստեղ միանշանակ պետք է տարբերակված մոտեցում լինի։ Յուրաքանչյուր խմբի համար առանձին առաջարկ պետք է գործի։ Ամբողջ աշխարհում այդպես է։ Որպեսզի հանրային տրանսպորտի վիճակը բարելավվի, պետք էր սկսել նախ լոգիստիկ բարեփոխումներից։ Եթե լոգիստիկան փոխվեր, ուղեվարձը չէր թանկանա։ Ծրագիրը պետք է ներառեր ուղեվարձը չթանկացնելը, ավտոբուսային պարկի վերանորոգումը, կանգառների կահավորումը (կանգառներ գրեթե չունենք)։
Մինչև հասարակական տրանսպորտը թանկացնելը՝ ես կառաջարկեի Երևանի քաղաքապետարանի բոլոր աշխատակիցներին պարտադրել ամսական առնվազն 5 անգամ երթևեկել հասարակական տրանսպորտով։ Հատկապես որոշումներ կայացնողները թող իրենց վրա զգային, թե տրանսպորտային ինչ ծառայություններ է մատուցում Երևանի քաղաքապետարանը»,- ասաց ավագանու անդամը։
Զարուհի Փոստանջյանը միաժամանակ հավելեց՝ տրանսպորտի գնի բարձրացումը քիչ թե շատ ընկալելի կլիներ այն դեպքում, եթե գործարկվեին մի շարք բարեփոխումներ՝ չվացուցակի մասին տեղեկություններ պարունակող միասնական բջջային հավելված, մաքուր և սարքին շարժակազմ, տարբերակված գնային առաջարկ և այլն։ Եթե այդ ժամանակ քաղաքապետարանը հայտարարեր, որ հնարավորություն չունի հանրային տրանսպորտը շահագործել նախկին սակագնով, գուցե թանկացումն այդ պարագայում հասարակության կողմից այլ կերպ ընդունվեր։
Հիշեցնենք, որ Երևանի քաղաքապետարանը ցանկանում է թանկացնել հասարակական տրանսպորտը: Այդ մասին երեկ հայտարարել է Երևանի փոխքաղաքապետ Սուրեն Գրիգորյանը: Նրա խոսքով, սակայն, ուղեվարձը չի թանկանալու այն չափով, որչափ նշվում է։
«Այո՛, տրանսպորտը թանկանալու է։ Պարզ բան է, ժողովուրդ ջան, հայտարարել են, ասել են, դառնալու է 260 դրամ, ասել ենք՝ սուտ է։ Նորից ասում ենք՝ սուտ է»,-ասել էր Սուրեն Գրիգորյանը։
