Արցախցու կամքն անկոտրում է. կա դժվարություններին դիմակայելու վճռականություն և պատրաստակամություն՝ որևէ կերպ չկաշկանդելու Հայաստանի քայլերը, որպեսզի վերջինս չգնա ոչ շահավետ լուծումների, Azg.am-ի թղթակցի հետ զրույցում ասաց արցախցի Արմեն Գալստյանը։
Նրա խոսքով՝ թեև Հայաստանն ու Արցախը կապող միակ ճանապարհն արդեն 10 օրից ավելի է՝ փակ է, սակայն արցախցիների մոտ հուսահատության նշույլ անգամ չկա։
«Ադրբեջանը, փակ պահելով Լաչինի միջանցքը, ցանկանում է վերջնականապես հայաթափել Արցախը, ամբողջ Արցախի վրա լիակատար վերահսկողություն սահմանել և դեռ ավելին՝ շրաջափակման մեջ դնել նաև Հայաստանը՝ «Զանգեզուրի միջանցքը» ստանալու համար»,- ասաց արցախցի տղամարդը՝ շեշտելով, որ այսպես կոչված «Զանգեզուրի միջանցքի» շահառուն ոչ միայն Ադրբեջանն է, այլ նաև ուրիշ կողմեր։
Արմեն Գալստյանի համոզմամբ՝ Արցախի կյանքի ճանապարհը փակ պահելն Ադրբեջանի կողմից սանձազերծված պատերազմի բաղադրիչն է, դրա շարունակությունը՝ հայ ազգին զրկելու պետությունից և պետականությունից։
Մեր զրուցակիցը միաժամանակ շեշտեց՝ ակնհայտ է, որ դրսի ուժերի և ոչ պետականամետ գործիչների միասնական ջանքերով հայ ժողովրդի պառակտման, սեպ խրելու փորձ է արվում։
Ինչ վերաբերում է ՀՀ իշխանությունների՝ Արցախի հարցում որդեգրած կեցվածքին՝ Արմեն Գալստյանը նկատեց՝ ռազմաքաղաքական ռեսուրսները պետք է տեղին և արդյունավետ օգտագործվեն։
«Այսօր հնարավորությունների պակասն է նաև պատճառ, որ Հայաստանն Արցախի անվտանգության երաշխավորի իր դերը չի իրագործում։ Սա քաղաքական խնդիր է՝ թե՛ իշխանության և թե՛ ընդդիմության։ Ամեն մեկս մեր տեղում պետք է լինենք՝ իրական միասնականության հասնելու և բոլոր ռեսուրսները կենտրոնացնելու համար»,- ասաց մեր զրուցակիցը։
