Սեպտեմբերի 23-ին Բեռլինում, կանցլերի նստավայրի առջեւ տեղի է ունեցել Արցախին նվիրված հանրահավաք։
Այն կազմակերպել էին Վտանգված ազգերի ընկերակցությունը, Ցեղասպանության ճանաչման հանձնախումբը, Գերմանահայոց առաջնորդարանը, Գերմանահայոց կենտրոնական խորհուրդը:
«Ազգի» ընթերցողը տեղյակ է, որ Վտանգված ազգերի ընկերակցության, Ցեղասպանության ճանաչման հանձնախմբի ուշադրության առանցքում է Արցախի օրհասական խնդիրը, տեղական մամուլում բազմիցս հանդես են եկել հրապարակումներով։
Բեռլինում կանցլերի գրասենյակի առջեւ նրանք պաստառներով լուռ բողոքի են դուրս եկել նաեւ սեպտեմբերի 23-ից առաջ: Անհրաժեշտ է նշել, որ այս հետեւողականությունը առավելաբար Թեսսա Հոֆմանի ջանասեր աշխատանքի արդյունքն է, նրա սերը Հայաստանի, Արցախի հանդեպ:
Սեպտեմբերի 23-ին Արցախին նվիրված հանրահավաք գումարվեց Մայնի Ֆրանկֆուրտում:
Մայնի Ֆրանկֆուրտում հայ համայնքին միացել էր նաեւ «Ընդդեմ ցեղասպանության»՝ թուրք եւ քուրդ անդամներով համալրված միությունը:
Լուսանկարները՝ Թեսսա Հոֆմանի և Հեսսենի հայ մշակութային միության ֆբ էջերից:
Անահիտ Հովսեփյան, Գերմանիա
