Մենք արդեն ավարտել ենք ծանր վիճակում գտնվող 3 արցախցի հիվանդների տեղափոխումը։ Նրանց հասցրել ենք Գորիսի բժշկական կենտրոն, հիվանդներին արդեն իսկ ընդունել են, նրանք բժիշկների հսկողության տակ են։ Նախատեսվում է Գորիսի ԲԿ-ի մասնագետների ուղեկցությամբ նրանց տեղափոխել Երևան , Azg.am-ի թղթակցի հետ զրույցում ասաց Ստեփանակերտի հանրապետական բժշկական կենտրոնի անհետաձգելի բուժօգնության բաժանմունքի վարիչ Գրիգորի Առուստամյանը։
«3 հիվանդների վիճակը կայուն-ծանր է։ Նրանք նեղ-մասնագիտական բժշկական օգնության կարիք ունեն։
Ինչ վերաբերում է Ստեփանակերտի հանրապետական բժշկական կենտրոնում բուժում ստացող մյուս պացիենտներին, նրանց համար արվում է անհրաժեշտ ամեն բան։ Աշխատանքները նորմալ ձևով ընթանում են։ Ճիշտ է, պլանային ընդունելություններ, որպես այդպիսին, չենք անում, եղած միջոցները խնայում ենք։
Մեծ թվով բուժառուներ կան, որոնք սպասում են, հասկանում են, մեր դրության մեջ են մտնում՝ մինչև լավ ժամանակներ կգան, և կկարողանանք իրենց վիրահատել»,- ասաց արցախցի բժիշկը։
Գրիգորի Առուստամյանը միաժամանակ տեղեկացրեց, որ այս պահի դրությամբ անհետաձգելի և շտապ դեպքերը լրիվ ծավալով սպասարկվում են, որևէ հիվանդի կյանքի վտանգ չի սպառնում։ Հիշեցնենք՝ Արցախի առողջապահության նախարարությունից ավելի վաղ տեղեկացրել էին՝ Արցախից 3 ծանր հիվանդ է տեղափոխվել Հայաստան։
