Առաջ ու վեր՝ դեպի աստղերը․ հայ լեռնագնացներն այս տարի եռագույնը ծածանել են Պամիրի ու Տյան–Շանի գագաթներին

Լեռնագնաց Հայկ Հայրապետյանը այս տարվա հուլիս-օգոստոս ամիսներին եղանակային բարդ պայմաններում կարողացել է մագլցել Պամիրի «Պիկ-Կորժենևսկայա» լեռը ու գագաթին՝ 7105 մետր բարձրության վրա, ծածանել հայոց եռագույնը։ Նախնական պատրաստությունը, կլիմայավարժանքը, բուն վերելքն ու հետդարձը տևել է 23 օր։

Իր ուղևորության ու դրա բարդությունների մասին խոսելիս Հայկն առանձնացրել է հատկապես ձնաճեղքերը, որոնք հատուկ են 6000 և ավելի մետր բարձրություններին։ Ամենատպավորիչը լեռնագնացի համար եղել են հարյուրավոր  մետրեր ձգվող սառցադաշտերն  ու ֆանտաստիկ տեսարանները, որ բացվում են այդ բարձրություններից և, իհարկե, աստղազարդ երկինքը։ Ասել է՝ այնտեղ «ավելի շատ աստղեր են, քան ոչ աստղեր։

Հայ լեռնագնացների այս տարվա հաջորդ նվաճումը Գևորգ Գասպարյանի վերելքն է Տյան-Շանի լեռնաշղթայի Խան–Թենգրի գագաթ՝ ծովի մակերևութից 7010 մետր բարձրությամբ։ Գևորգը վերելքն իրագործել է Ղրղզստանի տարածքից։

Այդ բարձրությունների վրա լեռնագնացի համար կարող է ճակատագրական լինել անգամ  մեկ սխալ քայլը։ Գևորգը պատմում է, որ ետդարձին կորցրել է արահետը, քանի որ ուժեղ քամին ու առատ ձյունը ծածկել էին առաջ ընկած ուղեկցորդի հետքերը։ Լեռնագնացն ստիպված թողել է կապված պարանն ու հայտնվել սառցադաշտի վրա։ Միայն հրաշքով է կարողացել փրկվել ու հասնել ուղեկցորդին։

Հայաստանի հանրային ռադիո