ՀՀ գործող իշխանությունների գործունեության վերաբերյալ գնահատականներ վաղուց եմ հնչեցրել, և այդ առումով որևէ բան չի փոխվել. նրանք հարգանք չունեն ՀՀ որևէ քաղաքացու նկատմամբ՝ բացառությամբ իրենց փոքր խմբակի անդամների և փոքրաթիվ աջակիցների։ Այս շրջանակների հանդեպ ՀՀ իշխանությունները որոշակի պարտավորվածություններ, այնուամենայնիվ, ունեն։ Azg.am-ի թղթակցի հետ զրույցում այս մասին ասաց իրավապաշտպան Ռուբեն Մելիքյանը՝ անդրադառնալով այն հարցին, թե ինչու գործող ռեժիմն ամբողջ ընթացքում լուռ էր և հիմա էլ շարունակում է որևէ կերպ չպաշտպանել Ադրբեջանի կողմից առևանգված և 11 տարի 6 ամիս ազատազրկման դատապարտվածերկու հայ զինծառայողներին։
Ըստ Մելիքյանի՝ ՀՀ իշխանությունները ջանք չեն գործադրում՝ պաշտպանելու սեփական քաղաքացիների ոտնահարված իրավունքները։
«Նրանք մարդկանց դիտում են միայն իբր՝ միջոց՝ երկարաձգելու իրենց իշխանությունը, նրանց օգտագործում իրենց խնդիրները լուծելու համար։
Միայն այն արտահայտությունը, որ ժամանակին արվեց Նիկոլ Փաշինյանի կողմից, և որն այդպես էլ մոռացվեց՝ «Նրանք մեզ կներեն 1-2 ամիս ավել գերության մեջ մնալու համար», բավական է, որ հասկանանք այսօրվա իշխանությունների վերաբերմունքն իրենց քաղաքացիների նկատմամբ։
Իսկ այդ վերաբերմունքը, շատ մեղմ ասած, ոչ հարազատական է։ Այնպես չէ, որ ՀՀ իշխանությունները հանգիստ չեն քնում, որ կարողանան գերիների հարցը լուծել։ Նման բան գոյություն չունի։ Նրանք շատ լավ էլ վայելում են իրենց դիզած հարստությունը և իշխանությունը»,- ասաց իրավապաշտպանը։
Ռուբեն Մելիքյանի համոզմամբ՝ ՀՀ ցանկացած քաղաքացի պետք է լուրջ մտավախություն ունենա, որ ինքն էլ կարող է հայտնվել Սումգայիթում 11 տարի 6 ամիս ազատազրկման դատապարտված երկու հայ զինծառայողների կարգավիճակում, այն է՝ պետության կողմից մոռացված և անտեսված, իր պխնդրի շուրջ առանց որևէ արձագանքի։
«Պետության կողմից այդ զինծառայողների մասով որևէ արձագանք չկա։ Այս օրինակով ՀՀ յուրաքանչյուր քաղաքացի կարող է մտածել, որ եթե ինքը նույնիսկ 100 տոկոսով օրինապահ վարքագիծ դրսևորվի, իրեն կարող են ձերբակալել, թևերը ոլորել-փշրել, և այդ ամենն իրավական որևէ հետևանք չունենա»,- ամփոփեց մեր զրուցակիցը։
Հիշեցնենք, որ Սումգայիթի դատարանը հայ զինծառայողներին դատապարտել է 11 տարի 6 ամիս ազատազրկման։ Նրանց կեղծ մեղադրանք է ներկայացվել «Ադրբեջանի պետական սահմանի անօրինական խախտման» և այդ երկրի տարածքում իբր «ահաբեկչական գործողության ծրագրման» համար:
Հիշեցնենք նաև, որ զինծառայողներ Հարություն Յուրիկի Հովակիմյանն ու Կարեն Աշոտի Ղազարյանը ադրբեջանցիների կողմից մայիսի 26-ին առևանգվել են ՀՀ ինքիշխան տարածքից։
