«Քաղաքացիական պայմանագիր» կուսակցությունն օգոստոսի 17-ին քաղաքացիական հայց է ներկայացրել ընդդեմ Դանիել Իոաննիսյանի «Իրազեկ քաղաքացիների միավորում» ՀԿ-ի՝ պահանջելով հերքել զրպարտություն համարվող տեղեկությունը եւ, որպես փոխհատուցում, ՔՊ-ին վճարել 1 մլն դրամ։ Դատական հայցի առիթ է հանդիսացել ՀԿ-ի կայքում հրապարակված մի հոդված՝ «ՔՊ-ն, այլ համայնքների վարչական ռեսուրսն օգտագործելով, ձայներ է հավաքում Երեւանի ընտրությունների համար» վերագրով, որում Իոաննիսյանի ՀԿ-ն հրապարակել է իր տեղեկությունները, ըստ որոնց՝ Սպիտակի համայնքապետ Քաջայր Նիկողոսյանը հանդիպումներ է ունեցել համայնքի բնակավայրերի վարչական ղեկավարների հետ եւ իրենց համայնքի հետ կապ ունեցող, սակայն Երեւանում հաշվառված քաղաքացիներին հորդորել՝ ավագանու ընտրություններին քվեարկել Տիգրան Ավինյանի եւ «Քաղաքացիական պայմանագրի» օգտին, իսկ այդ գործընթացի կուրացիան էլ ստանձնել է ԱԺ ՔՊ-ական պատգամավոր Գեւորգ Պապոյանը:
Դանիել Իոաննիսյանի աշխատակիցը զանգահարել է Սպիտակ համայնքի վարչական ղեկավարներին եւ նրանց խաբել, թե զանգահարում է Գեւորգ Պապոյանի օգնականը, ապա նրանց հետ քննարկել է Երեւանի ավագանու ընտրությունների ընթացքում նրանց գործողությունները, իսկ Սպիտակ համայնքի ղեկավարի տեղակալ Հովհաննիսյանը զրույցի ընթացքում պնդել է, որ ակնկալում է շուրջ 1000 ընտրողների երաշխավորված քվեարկություն: Այդ խոսակցությունների արդյունքում Դանիել Իոաննիսյանի ղեկավարած ՀԿ-ն հոդված է հրապարակել` գալով հետեւյալ եզրահանգման․
«Համայնքապետին իջեցված հրահանգը եղել է կուսակցության վարչության փոխնախագահ Գեւորգ Պապոյանի կողմից, որը Սպիտակի համայնքային ծառայողներ հանդիսացող համայնքապետի տեղակալին ու վարչական ղեկավարներին փոխանցվել է համայնքի ղեկավար Քաջայր Նիկողոսյանի միջոցով: Ձայնագրություններից նաեւ պարզ է դառնում, որ վարչական ղեկավարներն այս ցուցակագրումներն արել են աշխատավայրից: Այսպես, օրինակ, Ծաղկաբեր գյուղի ղեկավար Արամ Իգիթյանը հայտնեց․ «Ախպեր, ես հիմա տանն եմ, աշխատավայրում ա, էլի, ցուցակը»»:
Ի դեպ, այս տրյուկը Դանիել Իոաննիսյանը բանեցրել էր նաեւ 2017 թվականին` զանգահարելով դպրոցների տնօրեններին եւ ներկայանալով ՀՀԿ շտաբի ներկայացուցիչ ու տնօրենների հետ խոսակցությունները ձայնագրելով: Այդ միջադեպից հետո Իոաննիսյանը հայտնի դարձավ:
«Քաղաքացիական պայմանագիրը» դատարան ներկայացրած իր հայցում պահանջել է հերքել հոդվածը՝ հետեւյալ տեքստով․ «Հրապարակվել է լրատվական հոդված այն մասին, որ «Քաղաքացիական պայմանագիր» կուսակցությունն օգտագործում է այլ համայնքների վարչական ռեսուրսը՝ Երեւանի ընտրությունների համար ձայներ հավաքելու մեջ: Հայտնում ենք, որ դա չի համապատասխանում իրականությանը, եւ «Իրազեկ քաղաքացիների միավորում» խորհրդատվական հասարակական կազմակերպությունը զրպարտել է «Քաղաքացիական պայմանագիր» կուսակցությանը»:
Հայցադիմումը դատարանը վարույթ է ընդունել, այն մակագրվել է դատավոր Դանիել Մխեյանին, որի որոշմամբ՝ որպես հայցի ապահովման միջոց հայցապահանջի գնի չափով՝ 1 մլն դրամ, արգելանք է դրվել «Իրազեկ քաղաքացիների միավորում» ՀԿ-ի հաշիվների վրա։
Նշենք, որ Դանիել Իոաննիսյանն ու իր ՀԿ-ն մշտապես հանդես են գալիս ընդդեմ մամուլի ու լրագրողների, նրանց դեմ հայտարարություններ տարածում, ընդդեմ մամուլի տարբեր օրենսդրական նախաձեռնությունների մասնակից են, երբեմն էլ ակնհայտ պաշտպանում են իշխանություններիազատ խոսքը սահմանափակելու վարքագիծը։ Այս դրվագում, թերեւս, Իոաննիսյանն ու իր ՀԿ-ն հայտնվել են այն նույն վիճակում, որում իրենք էին հայկական մամուլին դնում լրագրողների հրապարակումների դեմ հրապարակումներ անելով, նրանց տեղեկատվությունը վարկաբեկելով ու սուտ հռչակելով։
