Ֆուտբոլի Հայաստանի չեմպիոն Երեւանի «Փյունիկը» ստացավ Հայաստանի սուպերգավաթը։
Հակոբ Տոնոյանի անվան սուպերգավաթը «Փյունիկի» ավագ Արտակ Դաշյանին հանձնեց Հակոբ Տոնոյանի որդին` Արա Տոնոյանը։
«Փյունիկը» սուպերգավաթին արժանացավ առանց պայքարի։ Հակոբ Տոնոյանի անվան Սուպերգավաթի հանդիպումը, որում մրցում են նախորդ մրցաշրջանի չեմպիոնը և գավաթակիրը, սովորաբար անցկացվում է ամեն տարվա սեպտեմբերին:
Դեռևս մինչև 2022/2023 մրցաշրջանի մեկնարկը «Նորավանք» ֆուտբոլային ակումբը դադարեցրեց գոյությունը:
2022 թ. սեպտեմբերի 24-ին Հայաստանի ազգային հավաքականն անցկացնում էր Ազգերի Լիգայի հերթական հանդիպումը՝ մրցելով Ուկրաինայի հավաքականի հետ: Հետևաբար, Սուպերգավաթի հանդիպման անցկացումն այդ օրը հնարավոր չէր:
Պայմանավորված եվրագավաթային ելույթներով՝ «Փյունիկի» գրաֆիկը չափազանց խիտ էր, ինչի պատճառով Սուպերգավաթի հանդիպման անցկացումը հնարավոր չեղավ նաև Fastex Հայաստանի Պրեմիեր լիգայի աշնանային հատվածում:
Հաշվի առնելով վերոնշյալ հանգամանքը, ինչպես նաև, հիմնվելով ՀՖՖ Պրոֆեսիոնալ ֆուտբոլի մրցումների կազմակերպման և անցկացման կանոնակարգի 6.09 կետի վրա, ՀՖՖ-ն կայացրել է հատուկ որոշում. չանցկացնել Սուպերգավաթի 2022 թ. հանդիպումը և մրցանակը շնորհել «Փյունիկ» ֆուտբոլային ակումբին:
ՀՖՖ Գործկոմի անդամ Տիգրան Ղարաբաղցյանը «Փյունիկի» գլխավոր մարզիչ Եղիշե Մելիքյանին հանձնեց 2022թ. Հայաստանի լավագույն մարզիչի մրցանակը։
News.am
