Օգոստոսի 30-ի դրությմաբ ՀՀ քաղաքացիություն ստանալու համար դիմել է Լեռնային Ղարաբաղից բռնի տեղահանված 4300-ից ավելի անձ, որոնցից քաղաքացիություն տրվել է շուրջ 3000-ին։ Այս մասին այսօր Ազգային ժողովի պետակաիրավական հարցերի մշտական հանձնաժողովի նիստի ժամանակ հայտնեց ՆԳՆ միգրացիայի և քաղաքացիության ծառայության պետ Արմեն Ղազարյանը:
«Այստեղ մի կարևոր նկատառում պետք է հաշվի առնել՝ անչափահասները չեն դիմում քաղաքացիություն ստանալու, որովհետև ծնողներին քաղաքացիություն տալուց հետո անձնագրի փոփոխությամբ անչափահասը դառնում է ՀՀ քաղաքացի»,-ասաց Ղազարյանը։
Պաշտոնյան միաժամանակ հիշեցրեց՝ Լեռնային Ղարաբաղից բռնի տեղահանված անձանց համար արդեն իսկ գործում է ՀՀ քաղաքացիություն ստանալու դյուրացված կարգ։
«Քաղաքացիության մասին օրենքով սահմանված է 90 աշխատանքային օր՝ մոտ չորս ամիս, բայց Լեռնային Ղարաբաղից բռնի տեղահանված անձանց պարագայում միջինում գործընթացը տևում է երկու ամիս։ Երկրորդ էական հանգամանքը, որ այս համակարգի պատմության ընթացքում ընդհանրապես այդպիսի բան տեղի չի ունեցել, մենք առաջին անգամ ենք կիրառում՝ մեր բոլոր տարածքային ստորաբաժանումները մարզերում ընդունում են քաղաքացիության դիմումներ, և դա էականորեն արագացնում է գործընթացը։
Հնարավորինս նաև արագացնում ենք գործընթացները․ եթե, օրինակ, ունենում են ծննդյան վկայականի խնդիր, արդարադատության նախարարության մեր գործընկերների հետ աշխատում ենք այդ խնդիրներն արագ ձևով լուծել»,-եզրափակեց Արմեն Ղազարյանը։
