«Արմեն-Համիկ եղբայրներ» ընկերության 13 հազար 500 կգ ընդհանուր քաշով օգտագործման համար ոչ պիտանի թռչնամիս է ոչնչացվել՝ թաղման եղանակով, Սննդամթերքի անվտանգության տեսչական մարմնի կողմից տրված համապատասխան եզրակացության հիման վրա, հաղորդում է Պետական եկամուտների կոմիտեն (ՊԵԿ)։
Սակայն, նույն օրը, ըստ ՊԵԿ-ի, նշված ընկերության ներկայացուցիչներն այցելել են ոչնչացման վայր (Կոտայքի մարզի Ակունք համայնքի Կոտայք գյուղ), տեխնիկայով քանդել են հողը, հողի տակից հանել են թռչնամիսն ու այն տեղափոխել ընկերության տարածք։
ՊԵԿ-ը փոխանցում է, որ իրականացված օպերատիվ միջոցառումների արդյունքում հողի տակից հանված ապրանքները հայտնաբերել են, համապատասխան արձանագրություններ են կազմվել, փորձանմուշներ են վերցվել։ Դեպքի առթիվ հաղորդում է ներկայացվել Քննչական կոմիտե։
Ընկերությունը դեռ չի մեկնաբանել հաղորդումը։
ՊԵԿ-ը կից տեսանյութ է հրապարակել։
