Վճարի դիմաց ժամկետային զինծառայությունից ազատվելու վերաբերյալ օրենքի նախագիծը հակասոցիալական է, որովհետև, ըստ էության, հարուստների զավակներն ու թողները հնարավորություն են ստանում գումարի դիմաց խուսափելու զինվորական ծառայությունից։ Azg.am-ի թղթակցի հետ զրույցում նման համոզմունք հայտնեց ռազմական փորձագետ Կարեն Վրթանեսյանը։
«Սոցիալական առումով սա խայտառակ վատ օրենք է, որն ուղղված է սոցիալական համերաշխության դեմ, այն համերաշխության, որ բոլորն, անկախ իրենց ֆինանսական հնարավորություններից, օրենքի առջև ունեն հավասար պարտավորություններ։ Այս օրենքով հավասարությունը խախտվում է՝ առավել ևս մի պետությունում, որը վերջին տարիներին անընդհատ գտնվում է պատերազմի, թշնամու ներխուժման սպառնալիքների տակ։
Ընդ որում՝ ՀՀ գործող իշխանություններն էլ դրա մասին խոսում են՝ հայտարարելով ցեղասպանության, ցանկացած պահի Ադրբեջանի հնարավոր ներխուժման մասին։ Բայց այս ամենին զուգահեռ՝ իշխանական պատգամավորն առաջ է քաշում մի օրենքի նախագիծ, որով փաստացի հարուստները կարող են չծառայել և իրենց կյանքը չվտանգել»,- ասաց Կարեն Վրթանեսյանը։
Ռազմական փորձագետը միաժամանակ նկատեց՝ ՀՀ զինված ուժերն ունեն համալրման հետ կապված լուրջ խնդիրներ, հակառակ դեպքում անպատրաստ, աշխատող մարդկանց ուսումնավարժական հավաքների պատրվակով չէին տանի առաջնագիծ՝ առանց պատշաճ նախապատրաստության մարտական հերթապահություն իրականացնելու։
«Այս ամենը հաշվի առնելով՝ վերոնշյալ օրենքը թե՛ ՀՀ պաշտպանվածության, և թե՛ սոցիալական արդարության տեսակետից խիստ խնդրահարույց է։ Առհասարակ, այս օրենքի նախագիծը շատ վատ ուղերձ է, այսինքն՝ փոխանակ խրախուսվի պետության պաշտպանությանը բոլորի մասնակցությունը, նման խտրական սկզբունք է կիրառվում։
Կրկնում եմ՝ արդեն իսկ օրենքի մակարդակով անհավասար պայմաններ են ստեղծվում ունևոր և չունևոր խավերի միջև։ Ակնհայտ է, որ եթե ունենայինք հայրենանվեր իշխանություն, այլ ոչ թե խամաճիկային բռնապետություն, այս ամենը նույնիսկ աբսուրդ կլիներ քննարկել»,- ընդգծեց մեր զրուցակիցը։
Անդրադառնալով ՔՊ-ական պատգամավոր հայկ Սարգսյանի հյատարարությանը, որ Հայաստանում ժամկետային զինծառայողների թիվը 9 տարվա ընթացքում պակասել է 44 տոկոսով՝ ռազմական փորձագետը նկատեց՝ անթւյլատրելի է նման թվերը բացեիբաց հանրայնացնել։
«Դա պետք է գաղտնի լինի։ Նման թիվ բարձրաձայնելը լրիվ այլ թեմա է»,- ամփոփեց Կարեն Վրթանեսյանը։
Հիշեցնենք, որ ՔՊ-ական պատգամավոր Հայկ Սարգսյանը շրջանառության մեջ է դրել օրենքի նախագիծ, որը հնարավորություն կտա 27 տարին լրացած և պարտադիր զինվորական ծառայություն չանցած քաղաքացիներին ազատվել քրեական պատասխանատվությունից։
Ըստ օրենքի նախագծի՝ 27 տարին լրացած և պարտադիր զինվորական ծառայություն չանցած քաղաքացիները կարող են բանակում ծառայել երկու տարի ժամկետով կամ ծառայել 1 տարի և պետբյուջե վճարել 2.5 մլն դրամ, ծառայել 6 ամիս ժամկետով և պետբյուջե վճարել 5 մլն դրամ, ծառայել 1 ամիս ժամկետով և պետբյուջե վճարել 10 մլն դրամ, և վճարել 15 մլն դրամ՝ ծառայության դիմաց։
