ՀՀ վարչապետի այն խոսքերում, որ «եթե եկեղեցու հարաբերությունները կառավարության հետ լավ չեն, ուրեմն եկեղեցու հարաբերությունները լավ չեն Աստծո հետ», աստվածաբանական որևէ միտք չկա. սա ընդամենն ինքնաարդարացման ոչ այդքան հաջող փորձ է, որով այդ անձը փորձում է մի տեսակ լրագրողական տրամաբանությամբ ինչ-որ մեջբերում հիմնավորել։ Բայց Պողոս առաքյալի թուղթը հռոմեացիներին և այլ եկեղեցիների ներկայացուցիչներին լրագրողական հոդված չէ, որից կարելի է կոնտեքստից կտրված մեջբերումներ անել։ Azg.am-ի թղթակցի հետ զրույցում նման տեսակետ հայտնեց Մայր Աթոռ Սուրբ Էջմիածնի դիվանատան եկեղեցական ժողովական գրասենյակի պատասխանատու Տեր Տիգրան քահանա Բադիրյանը։
Նրա խոսքով՝ Պողոս առաքյալի թուղթը հստակ տրամաբանությամբ, կոնկրետ Եկեղեցու խնդրի վերաբերյալ վերջինիս տեսակետն է։
«Եկեղեցու մասին պատկերացումները կարող են ճշմարիտ լինել միայն այն դեպքում, երբ մարդը Քրիստոսի մարմնի անդամ է, Եկեղեցու անդամ է, Սուրբ Հաղորդություն է ստանում։ Եթե հարցին զուտ աստվածաբանորեն նայենք, Սուրբ Հոգին ներգործում է Տիրոջ մարմնի մեջ, այսինքն՝ Եկեղեցու մեջ։ Եթե մարդը դուրս է այդ Եկեղեցուց, իր բոլոր դատաղությունները միգուցե գիտական-քաղաքական առումներով կարող են իրենց մեջ ճշմարտության ինչ-որ հատիկ ունենալ, բայց աստվածաբանական տեսակետից միանշանակ մերժելի և սխալ են։
Նման մոտեցումներ Եկեղեցին շատ վաղուց է տեսել և լսել, և պատմության ընթացքում էլ նման դեպքեր ունեցել ենք, երբ երկրի առաջին դեմքը Եկեղեցու հանդեպ վատ վերաբերմունք է ունեցել։ Պատմությունը մեզ շատ հստակ ցույց է տվել, թե ինչ հանգուցալուծումներ են եղել, որովհետև դեմքերն անցնում-գնում են, բայց Եկեղեցին Աստծո հավիտենական թագավորության ներկայությունն է Երկրի վրա։
Այնպես որ դժվար է հոգևոր տեսանկյունից մեկնաբանել ՀՀ վարչապետի ելույթը, որովհետև այնտեղ հոգևոր ընկալում ընդհանրապես չկա։ Սուրբ գրքի ընկալումն էլ ավելի ոչ ավանդական և ոչ հայրաբանական ավանդության մեջ է, այլ ավելի ինքնաարդարացման և անձնապաշտական է»,- ասաց Տեր Տիգրան քահանա Բադիրյանը։։
Հիշեցնենք, որ Նիկոլ Փաշինյանը երեկ հայտարարել էր՝ համաձայն չէ, որ Հայ առաքելական եկեղեցու հարաբերությունը կառավարության հետ լավ չէ, և առկա են խնդիրներ:
«Շատ տարօրինակ ու աղմկոտ հայտարարություն եմ անելու. եթե եկեղեցու հարաբերությունները կառավարության հետ լավ չեն, ուրեմն՝ եկեղեցու հարաբերությունները լավ չեն Աստծո հետ», – ասել էր նա:
Փաշինանն իր ելույթը ավարտել էր Պողոս առաքյալի՝ հռոմեացիներին ուղղված թղթով. «Չկա իշխանություն, որ Աստծուց չլինի ու եղած իշխանությունները Աստծուց են կարգված, հետևաբար, ով հակառակում է իշխանությանը, Աստծո հրամանին է հակառակում»:
