Ուշադրություն շեղելու փորձ ու սովորական զրպարտություն. «5-րդ ալիք»-ը հայտարարել է, որ դրանցով կզբաղվեն փաստաբանները

27

«5-րդ ալիք» ՀԸ-ն արձագանքել է իշխանական քարոզչամեքենայի հրապարակումներին, թե իբրև կին օպերատորն է պատմամշակությաին արժեքներ հանդիսացող շենքերի զարդանախշերի վրա մխրճում հեղույսը։

Հիշեցնենք, որ Երևանում ամանորյա լուսավորության աշխատանքների ընթացքում վնասվել են մի շարք պատմամշակութային արժեք հանդիսացող շենքեր, զարդանախշերի վրա հայտնվել են հեղույսներ, անցքեր։ Պատմամշակութային արժեքները վնասելու բեռը բաշխելիս Տիգրան Ավինյանն այսօր կրկին նախկիններին է հիշել՝ պնդելով, որ հեղույսներն իրենց հետ կապ չունեն, դրան դեռևս նախկին ժամանակներից են, իսկ այն բանից հետո, երբ «հիշեց», որ ռեպորտաժը պատրաստվել էր «5-րդ ալիք»-ի կողմից, սկսեց թիրախավորել լրատվամիջոցին և ռեպորտաժի հեղինակին։ Ավինյանի արձագանքից հետո հայտնի «Ֆեյքերի ՊՈԱԿ»-ի Տարոն Չախոյանը, որն այժմ վարչապետի աշխատակազմի ղեկավարի տեղակալն է, հրապարակել է կառավարության շենքի անվտանգության տեսախցիկերի տեսագրությունից մի հատված՝ ներկայացնելով, թե իբրև լրատըվամիջոցի օպերատորն է զարդանախշերի վրա մխրճում հեղույսը։

«5-րդ ալիք» ՀԸ-ն արձագանքել է հրապարակումներին՝ արձանագրելով, որ դա զրպարտություն է։

«Այսօր իշխանական լրատվամիջոցները հասանելիություն են ստացել Հանրապետության Հրապարակի շենքերի տեսահսկման սարքերին ու շռնդալից տարածում են մի տեսանյութ, որտեղ երևում է, թե ինչպես է 5-րդ ալիքի օպերատորը կադրեր անելու նպատակով տեղաշարժում, ինչպես քաղաքապետարանն է ասում, շենքի պատը մխրճված հեղույսը։ Հավանաբար երբեք օպերատորի աշխատանքը մոտիկից չտեսած լրագրողներն աղմկում են, իբր օպերատորն է հեղյուսը մտցրել պատը, նույն լրագրողները չեն բացատրում, թե ինչպես են հազարավոր ուրիշ հեղյուսներ մխրճվել շենքերի պատերի մեջ և այդ ինչ չարագործներ են դրանց վրա ամանորյա լույսեր ավելացրել, նույն լրագրողներն ասես չեն նկատել գայլիկոնով պատմամշակութային հուշարձանի պատերն ապականողների տասնյակ կադրերը։ Իշխանական քարոզչության զարդը դարձած տսանյութից հեռացված է սկիզբը, որում հաստատ երևում է, թե ինչպես է օպերատորը պատի միջից հանել հեղյուսը, հետո տեղը դրել։ Օպերատորը պատմել է, որ ինքն արդեն ջարդված պատը նկարահանելիս նկատել է զարդաքանդակի մեջ մխրճված հեղյուսը և որպես սրտացավ քաղաքացի հանել է այն, հետո որպեսզի ցույց տա իր տեսածը՝ հեղյուսը վերադարձրել է նույն տեղը, նկարահանել ու նորից հանել»,- նշել են ԶԼՄ-ից՝ արձանագրելով, որ Թամանյանական շենքերը, ճարտարապետների խոսքով, թուրքական ձեռագրով ավիրող խայտառակ գործողությունից հանրության ուշադրությունը շեղելու համար իշխանությունը փորձում է քավության նոխազ դարձնել կին օպերատորին։

«Սա սովորական զրպարտություն է մեր հանդեպ, որով մեր փաստաբանները կզբաղվեն։ Մենք սովորաբար չենք արձագանքում մեր դեմ իշխանական ֆեյքերի ու քարոզիչների էժան մանիպուլյացիաներին, բայց այս դեպքում որոշեցինք չլռել, որովհետև Հարապետության հրապարակում, ըստ մասնագետների, տեղի ունեցող հանցագործությունից բոլորիս ուշադրությունը շեղելու համար սկսված արշավը կարող է ազդել մեր բազմահազարանոց լսարանի տարամադրության վրա։ Այս պարզաբանմամբ, սիրելի հեռուստադիտողներ, ուզում ենք Ձեզ ասել, որ մեզ համար ամենաթանկը Ձեր վստահությունն է»,- նշել են ԶԼՄ-ից։