Մարտի 14-ին՝ ժամը 12։00-ին, ՀՀ վարչապետ Նիկոլ Փաշինյանը հանդես կգա հերթական մամուլի ասուլիսով։
Արդեն 2-րդ անգամ ասուլիսը կազմակերպվում է լրատվամիջոցների հետ հարցուպատասխանով, ոչ թե առցանց տարբերակով, ինչպես սովոր էր լրագրողների հետ չհաղորդակցվել վարչապետը։
Մարտի 13-ին՝ աշխատանքային օրվա ընթացքում, լրատվամիջոցները պետք է զանգարահարեին Կառավարության լրատվական ծառայություն՝ վաղվա ասուլիսին հավատարմագրվելու։
Ըստ կարգի՝ «Ազգի» խմբագրությունց ևս զանգահարեցին Կառավարություն՝ տեղեկացնելու, որ լրատվամիջոցն ուզում է լուսաբանել Փաշինյանի ասուլիսը և «Ազգի» լրագրողին հավատարմագրել։
Կառավարության լրատվական ծառայությունից պատասխանեցին՝ համապատասխան անձանց կհաղորդենք, որ «Ազգի» խմբագրությունը լրագրողի հավատարմագրման համար հայտ է ներկայացնում և ընթացքի մասին ձեզ տեղյակ կպահենք։
Աշխատանքային օրվա ընթացքում մի քանի անգամ զանգահարեցինք՝ տեղեկանալու՝ հավատարմագրումն ընդունվա՞ծ է, թե ոչ։
Վերջին զանգին պատասխանեցին՝ «Ազգի» հավատարմագրումը մերժվել է։
Հարցրինք՝ ի՞նչ պատճառով։
Ուղղակի մերժվել է՝ պատասխանեցին։
Ինչպես նախորդ ասուլիսին, այս անգամ էլ ՀՀ կառավարությունը խտրականորեն, անհասկանալի սկզբունքով է ընտրություն կատարել լրատվամիջոցների միջև։
Ի՞նչ տրամաբանությամբ են ընտրվել լրատվամիջոցները, ո՞վ է ընտրությունը կատարել. վիճակահանությո՞ւն է եղել, թե քմահաճույք։ Եթե ասուլիս է՝ կենդանի հարցուպատասխանի ձևաչափով, ուրեմն բոլորը պետք է հրավիրված լինեն, և ոչ ոք չպետք է մերժվի։
Եթե ասուլիս, ուրմեն՝ բոլորի համար, կամ՝ ոչ մեկի։ «Ժողովրդավարության բաստիոնում» մի՞թե այսպես են վերաբերվում ազատ խոսքի նկատմամբ։ Ո՞ւմ արյունն է մյուսից կարմիր։ Ամբողջ կառավարությունում մի՞թե չկա մի սրահ, որտեղ բոլոր զլմ-ները տեղավորվեին, մանավանդ որ միայն լրագրողներին են հավատարմագրել, օպերատորներ ասուլիսին չեն լինելու։
Այսինքն՝ օպերատորներին ու նրանց սարքավորումները տեղավորելու խնդիր առհասարակ չկա, ասուլիսը նկարահանելու է միայն Հանրային հեռուստաընկերությունը։
Պետական մարմինները, այդ թվում՝ վարչապետը, պարտավոր է հասանելի լինել տեղական լրատվամիջոցների համար ու պատասխանել նրանց ցանկացած հարցին։
Ի՞նչ է նշանակում՝ այս լրատվամիջոցը կարող է ներկա լինել ասուլիսին, մյուսը՝ ոչ. և առանց հիմնավորման, առանց որևէ պատճառաբանության, ուղղակի՝ ոչ։
Ուղղակի Նիկոլ Փաշինյանն այդպես է կամենում ու վերջ։
Իսկ «մերժված» զլմ-ներից հարկերը, խմբագրության ծախսերը պահանջելիս նույն Փաշինյանը կամ նրա ղեկավարած կառավարությունն ասո՞ւմ են՝ չեք ուզում, այս անգամ էլ վճարումներ մի արեք, չէ՞ որ մենք էլ մեր աշխատանքն ենք ըստ տրամադրության ու ըստ մեր քմահաճույքի կատարում։
Վաղուց եք հասկացնել տվել, որ բոլոր ոլորտներին կամայականորեն ու քմահաճորեն եք մոտենում ու անպատժելի եք, բայց մեկ-մեկ էլ գոնե ձևացրեք, թե ինքներդ ձեր սանձարձակության հետ անհաշտ եք։
