Աղվան Հոսեփյանի  հիվանդությունները անհամատեղելի են կալանքի հետ. ի՞նչ հարցերի պատասխաներ պետք է տա հանձնաժողովային փորձաքննությունը

18

Երևանի ընդհանուր իրավասության դատարանի դատավոր Մնացական Մարտիրոսյանը բավարարեց ՀՀ նախկին գլխավոր դատախազ, ՔԿ նախկին նախագահ Աղվան Հովսեփյանի նկատմամբ դատաբժշակական հանձնաժողովային փորձաքննություն նշանակելու մասին պաշտպանների ներկայացրած միջնորդությունը։

Ըստ պաշտպանական կողմի՝ Հովսեփյանը մայիսի 30-ին տեղափոխվել էր «Միքայելյան» վիրաբուժության ինստիտուտ: Հունիսի 6-ին՝ վիրահատվել է:

Էրիկ Ալեքսանյանի հավաստմամբ՝ Հովսեփյանի մոտ ի թիվս այլնի, ախտորոշվել է նաև շաքարային դիաբետի 2-րդ տիպ, ինսուլինակախյալ, որը զուգորդված է պոլինևրոպատիայով:

«Աղվան Հովսեփյանը երկար տարիներ է տառապում շաքարային դիաբետով, պարզապես ներկա պահին  հիվանդությունը նրա մոտ ունի ծանր ընթացք: Վերջին շրջանում Հովսեփյանի մոտ շաքարի մակարադակը արյան մեջ հասնում է մինչև 21-ից 28 նիշի»,- դատարանում ասաց Էրիկ Ալեքսանյանը:

Հովսեփյանի մոտ առկա հիվանդությունները անհամատեղելի են կալանքի հետ, փաստեցին նախկին գլխավոր դատախազի պաշտպանները։

Մեղադրող դատախազները չառարկեցին միջնորդության դեմ:

«Առկա է բժշկական տեղեկանք և բժշկական փաստաթղթի հիմնավորվածությունը կարող է ստուգվել միայն դատաբժշկական փորձաքննություն նշանակելու եղանակով»,- նշեց դատախազ Գուրգեն Սաֆարյանը։

Դատավոր Մնացական Մատիրոսյանը հանրայնացրեց այն հարցերը, որոնց պետք է պատասխանի փորձգետներից ձևավորված հանձնաժողովը.

1. Ի՞նչ հիվանդություններով է տառապել և տառապում Աղվան Հովսեփյանը: Ինչպիսի՞ ախտորոշմամբ, ի՞նչ վաղեմություն ունեն դրանք:  

2. Աղվան Հովսեփյանի առողջական վիճակը 2021թ.-ի սեպտեմբերի 8-ից միչև օրս բացասական դինամիկա ունեցել է, եթե այո, ապա ինչպիսի՞:

3. Աղվան Հովսեփյանը բուժօգնություն կարիք ունի՞, թե՞ ոչ: Եթե այո, ապա ի՞նչ ծավալի, ինչպիսի՞ պայմաններում և ինչպիսի՞ բուժհաստատություններում:

4. Հովսեփյանի հիվանդությունները և հատկապես նրա մոտ ախտորոշված շաքարային 2-րդ տիպ, ինսուլինակախյալ, որը զուգորդված է պոլինևրոպատիայով դասվում են արդյո՞ք ՀՀ կառավարության 26.05.2006թ.-ի թիվ 725 Ն որոշմամբ նշված հիվանդությունների շարքին: Դրանք քրեակատարողական հիմնարկի պայմաններում խոչնդոտում են նրա նկատմամբ որպես խափանման միջոց կիրառված պատժի և կալանքի կրմանը:

5. Արդյոք ճի՞շտ է Աղվան Հովսեփյանին տրված ախտորոշումը:

6. Աղվան Հովսեփյանի մոտ ախտորոշված հիվանդությունները պատճառահետևանքային կապի մեջ գտնվու՞մ են նրա տարած վիրահատության հետ: Վիարհատությունից հեոտ սկսված բարդությունների արդյո՞ք անցողիկ են, թե՞ ոչ:

Դատարանը փորձագիտական հանձնաժողովին կտրամադրի նաև քրեական գործի նյութերում առկա Հովսեփյանի վերաբերյալ բժշկական փաստաթղթերը:

Նշենք, որ Աղվան Հովսեփյանը ձերբկալվել է 2021թ սեպտեմբերի 7-ին: Նախաքննական մարմինը շուրջ 1.5 տարի քննվող քրեական գործի շրջանակներում մեղադրանք է առաջադրել Հովսեփյանին և նրա նկատմամբ որպես խափանման միջոց ընտրել կալանավորումը։

Աղվան Հովսեփյանին մեղադրանք է առաջադրվել ՀՀ քրեական օրենսգրքի 310-րդ հոդվածով, 311-րդ հոդվածի 4-րդ մասի 2-րդ կետով, 38-308-րդ հոդվածի 2-րդ մասով, 38-179-րդ հոդվածի 3-րդ մասի 1-ին կետով, 190-րդ հոդվածի 3-րդ մասի 1-ին կետով (2 դրվագ) և 190-րդ հոդվածի 2-րդ մասի 1-ին կետով:

Վրեժ Մարկոսյանին մեղադրանք է առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով: Նրա նկատմամբ որպես խափանման միջոց է ընտրվել ստորագրություն չհեռանալու մասին: