Դատարանում Փաշինյանի շահերը ներկայացնող Գևորգ Գյոզալյանին «առաջ են քաշել»

22

ՀՀ երկրորդ նախագահ Ռոբերտ Քոչարյանն ընդդեմ Նիկոլ Փաշինյանի քաղաքացիական գործով  հուլիսի 6-ի դատական  նիստը շատ կարճ է տևել:

Փաշինյանը դատարանում նոր ներկայացուցիչ ունի, որը գործի նյութերին ծանոթանլու համար ժամանակ է խնդրել: Մինչ այդ, Փաշինյանի շահերը ներկայացնում էր փաստաբան Գևորգ Գյոզալյանը: 

Նշենք, որ հունիսին 28-ին ԱԺ  արտահերթ նստաշրջանում, ի թիվս այլոց,
Վճռաբեկ դատարանի հակակոռուպցիոն պալատի քաղաքացիական գործեր քննող դատավոր ընտրվեց «Գևորգ Գյոզալյան» փաստաբանական գրասենյակի ղեկավար, փաստաբան Գևորգ Գյոզալյանը:

Դատավոր Ալեքսեյ Սուքոյանը բավարարեց միջնորդությունն ու նիստը հետաձգեց մինչև հոկտեմբեր:

«2008 թվականի մարտի 1-ին  Հայաստանի այն ժամանակվա կառավարողները բանակը հանեցին ժողովրդի դեմ,  Հայաստանի քաղաքացիներին գնդակահարելու որոշում կայացրին:  Շատ կարևոր  է  արձանագրել, որ այս գործով՝  Մարտի 1-ի գործով,  կան մեղադրվող անձինք, որոնք այսօր կանգնած են դատարանի առաջ ու պիտի, այո, արձանագրեմ, որ Մարտի 1-ի  գործն, ըստ էության, իմ գնահատմամբ, բացահայտված  է». Ռոբերտ Քոչարյանը պահանջում  է  վարչապետ Փաշինյանից  հերքել  2021-ի  մարտի 1-ին Հանրապետության հրապարակի հանրահավաքում  2008-ի մարտյան իրադարձությունների  և գործի քննության վերաբերյալ արած վերոնշյալ հայտարարությունները: Պահանջում  է նաև որպես ոչ նյութական վնաս՝  փոխհատուցել  4 միլիոն դրամ։ Հայցն ուղղված  է  ոչ միայն վարչապետի,  այլև Հայաստանի Հանրապետության դեմ։

Հիշեցնենք, որ սա  ՀՀ երկրորդ նախագահի երկրորդ հայցն  է՝   ընդդեմ Փաշինյանի:  Այդ հայցով Ռոբերտ Քոչարյանը պահանջում  է  Փաշինյանից հերքել 2020-ի սահմանադրական հանրաքվեի քարոզարշավի ժամանակ կոռուպցիոն գործարքների մասին հայտարարության մեջ իր անվան հիշատակումը։

Ըստ հայցի՝  պահանջվում է հրապարակայնորեն արտահայտված զրպարտությունից պատիվը  և արժանապատվությունը պաշտպանելու և զրպարտությամբ պատճառված ոչ նյութական վնասի հատուցում՝   2 մլն դրամի չափով։ Հայցադիմումի հիմք էին հանդիսացել սահմանադրական բարեփոխումների քարոզարշավի ժամանակ Նիկոլ Փաշինյանի հայտարարություններն առ այն, որ 4 մլրդ դոլարով պետք է ավելանա պաշտպանության բյուջեն, որից 1,2 մլրդը պետք է վերադարձվի՝  որպես  թալանված գումար: Հենց այդ հայտարարության ժամանակ հնչել է  ՀՀ  երկրորդ նախագահի անունը: Փաստացի խախտվել  է Ռոբերտ Քոչարյանի անմեղության կանխավարկածը՝ համոզված է հայցվոր կողմը: