Մնացական Մարտիրոսյանին բացի իր դիրքորոշումից, որևէ այլ դիրքորոշում հետաքրքիր չէ: Ավետիք Չալաբյանի գործով դատական նիստից հետո լրագրողների հետ ճեպազրույցում ասաց Չալաբյանի պաշտպան Վարազդատ Հարությունյանը:
«Ես հիմա վերադառնում եմ կալանավայրից, Ավետիք Չալաբյանին տեսակցել եմ, խոսել եմ բուժմասի աշխատողների հետ, ովքեր ինձ տեղեկացրեցին, որ նրա մոտ զարկերակային ճնշման խնդիր է, նաև տաքություն ունի: Նաև հայտնեցին, որ Չալաբյանը պնդել է, որ պետք է մասնակցի նիստին, երկարատև բանակցություններից հետո բժիշկները կտրուկ արգելել են՝ ասելով, որ իրավուքն չունեն թույլ տալ մասնակցել դատական նիստին ու համապատասխան տեղեկանք են ուղարկել դատարան:
Նա այս քանի օրերի ընթացքում էլ է ճնշում ունեցել, բայց դրա մասին չէր բարձրաձայնում, որպեսզի մասնակցի դատական նիստերին, սակայն այսօր քանի որ տաքություն էլ է ունեցել, բժիշկները թույլ չեն տվել»:
Գործով մյուս փաստաբան Արթուր Հարությունյանն էլ ընդգծեց, որ Չալաբյանի կալանքն այսօր ավարտվում է 21:00-ին. «Իսկ նոր դատական ակտ, որով կերկարացվեր կամ այլ խափանման միջոց կկիրառվեր պարզապես չկա և չի կարող լինել, որովհետև հետաձգվեց դատական նիստը: Այնպես որ այսօր՝ ժամը 21:00-ին պարոն Չալաբյանն ազատ կարձակվի քրեակատարողական հիմնարկից»:
