Միանշանակ չէի ասի, որ Լաչինի միջանցքի տոտալ փակմամբ տրվել է Արցախն Ադրբեջանի կազմում թողնելու հետհաշվարկը, բայց ակնհայտ է, որ Էրդողանի՝ Ադրբեջան այցից հետո այդ երկրի ղեկավարությունը քարտ բլանշ ստացավ։ Թուրքիայի հին-նոր իշխանությունները թարմացրեցին իրենց հարաբերությունները, Ադրբեջանի հետ որոշակիորեն կոորդիացված գործողություններ իրականացվեցին, որոնք էլ Ալիևին հնարավորություն տվեցին հայտարարելու, որ «Հայաստանը պետք է փաստաթղթով ամրագրի այն, ինչ արդեն հայտարարել է, որ Ղարաբաղն Ադրբեջան է»։ Azg.am-ի թղթակցի հետ զրույցում այս մասին ասաց քաղտեխնոլոգ Վիգեն Հակոբյանը։
«Ընդ որում՝ Ալիևը պնդում է, որ այդ փաստաթուղթը ստորագրվի առանց նախապայմանների։ ՀՀ ղեկավարությունն էլ դեմքը պահպանելու համար փորձում է թղթի վրա ինչ-որ երաշխիքներ ստանալ, որ ադրբեջանցիներն արցախցիներին չեն մորթելու։ Ադրբեջանը հրաժարվում է Հայաստանի որևէ նախապայման ընդունել՝ անընդհատ շեշտոլով, որ դա իր ներքին խնդիրն է, և ոչ ոք իրավունք չունի խառնվելու իր հարցերին։
Ալիևը Բաքվի և Ստեփանակերտի շփումները զուտ խոսակցություն է համարում. այդ մենք ենք բանակցություն որակում, իրենք համարում են, որ դա իրենց ներքին խոսակցությունն է։ Իրենք ասում են՝ եթե Արցախն ադրբեջանական տարածք է, իրենք էլ որոշում են՝ իրենց տարածքով շարժ թո՞ւյլ տալ, թե ոչ»,- ասաց քաղտեխնոլոգը։
Վիգեն Հակոբյանի համոզմամբ՝ ստեղծված իրավիճակի հանգուցալուծումը մեկն է՝ կարողանալ աշխատել միջազգային բոլոր խաղացողների հետ։
«Լուծումն այն չէ, որ Արցախը պետք է գնա Ադրբեջանի հետ բանակցելու։ Լուծումն այն է, որ կարողանաս լեզու գտնել դրսի խաղացողների հետ՝ առանց նրանց հակասությունների մեջ դնելու։ Իսկ Ռուսաստանի ԱԳ-ն երեկ առավել քան կոշտ հայտարարություն արեց՝ ասելով, որ ԱՄՆ-ն ստիպում է Լեռնային Ղարաբաղին հանդիպել Ադրբեջանի հետ։ Ռուսաստանը նույնիսկ անուն տվեց, ինչն աննախադեպ է («ՌԻԱ Նովոստի» գործակալությունը գրել էր, որ իր զրուցակցի խոսքով՝ «ամերիկյան «խաղաղապահ նախաձեռնության» լոբբինգն իրականացնում է Լեռնային Ղարաբաղի ԱԳ նախարար Սերգեյ Ղազարյանը՝ խմբ.)։
Ռուսներն ուզում են ասել, որ իրենք ամեն ինչ հասկանում են, և որ առանց Արցախի գործող ղեկավարության՝ ոչինչ տեղի չի ունենում։ Մեկ անուն հնչեցնելով՝ ՌԴ-ն ուղղակիորեն թիրախավորեց Արցախի ղեկավարին»,- ասաց քաղտեխնոլոգը։
Մեր զրուցակցի համոզմամբ՝ ՀՀ իշխանությունը պետք է ի վերջո ձևակերպի, թե ինչ է ուզում անի. եթե ուզում է Արցախը հանձնել և Արևմուտքի միջոցով այդ հարցը փակել, դա մեկ բան է, եթե ուզում է օգտագործել Ռուսաստանի կողմից ընձեռնված հնարավորությունները՝ բոլորովին այլ բան։ Բայց ՀՀ ղեկավարությունն արդեն այնքան է խճճվել իր գործողություններում և պրոցեսներում այնքան քիչ դերակատարություն ունի, որ չի կարողանում որևէ քայլ ձեռնարկել։
«Երբ փորձում ես քո գաճաճ հալով, մտավոր և ռեսուրսային ցածր պոտենցիալ ունեցող իշխանական վերնախավով խաբել բոլորին, խաղալ նրանց հակասությունների վրա, այս վիճակին ես արժանանում»,- ամփոփեց Վիգեն Հակոբյանը։
