Ուրեմն, Հանրային ծառայությունները կարգավորող հանձնաժողովի նախագահը, հիշեցնեմ՝ ըստ օրենքի Անկախ հանձնաժողովի նախագահը, որը մինչ այդ պաշտոնում հայտնվելը ՔՊ կուսակցական էր, հայտարարում է, որ ամերիկյան մոդուլային ատոմակայանը գրավիչ է Հայաստանի համար: Հետո թվարկում մի երկու՝ իր կարծիքով առավելություն:
Հետո, դրա մասին լուրի տեքստում կարդում ենք. «Նա ոչ բնականոն է համարել այն փաստը, որ վերջին ամիսներին մոդուլային ԱԷԿ-ի կառուցման մասին խոսում են բացառապես քաղաքական գործիչներն ու քաղաքական վերլուծաբանները, մինչդեռ անհրաժեշտ է, որ իրենց կարծիքն արտահայտեն փորձագետները»:
Մեսրոպ Մեսրոպյանին թվում է, թե ինքը օրինակ, փորձագետ է եւ կարող է կարծիք հայտնել: Զուտ մասնագիտորեն՝ նա համապատասխանում է այդ թեմայով մասնագիտական, այսինքն էներգետիկ—ճարտարագիտական ասպեկտի վերաբերյալ մասնագիտական գնահատական հայտնելուն: Բայց, ամբողջ հարցն այն է, որ նա դառնում է երկրորդ «Հակոբ Մովսես», որը չի տարբերակում, որ հարկատուների հաշվին իրեն բարձր աշխատավարձ են վճարում ոչ թե «փորձագիտական» եթերների կամ ասուլիսների համար, այլ Անկախ հանձնաժողովի անդամի պարտականությունը կատարելու:
Իհարկե այդ իմաստով մեր անկախ հանձնաժողովներում «Մովսեսները» երկուսը չեն՝ շատ են, բայց տվյալ պարագայում ՀԾԿՀ հանձնաժողովի նախագահը պետք է գիտենա, որ, ինքը մոդուլային ռեակտորների մասին կարծիք պետք է հայտնի բացառապես Անկախ հանձնաժողովի ֆունկցիոնալ շրջանակում, երբ այդ հարցը հասնի հանձնաժողովին՝ եթե հասնի, ու պահանջի համապատասխան եզրակացություն:
Եթե ոչ, ապա նա պետք է այդպիսի հարցերում լռի, որովհետեւ փորձագետ չէ, այլ անկախ հանձնաժողովի նախագահ:
Հակոբ Բադալյան, քաղաքական վերլուծաբան
