Գորիսի համայնքապետ Առուշ Առուշանյանն ազատ է արձակվել։ Այս մասին «Փաստինֆո»-ի հետ զրույցում ասաց Առուշ Առուշանյանի փաստաբան Էրիկ Ալեքսանյանը։
Ինչպես արդեն տեղեկացրել ենք՝ քիչ առաջ ՀՔԾ է բերման ենթարկվել Գորիս համայնքի ղեկավար Առուշ Առուշանյանը։ Ընդ որում՝ Առուշանյանին բերման ենթարկելու որոշում է կայացվել այն պարագայում, երբ նա վաղ առավոտյան գտնվել է Երեւանում, հարցազրույցներ տվել ու չի խուսափել ներկայանալ նախաքննական մարմնին։ Ասել է թե՝ հրավերի դեպքում նա անձամբ կներկայանար։ Հետաքրքիր զուգադիպությամբ նրան բերման են ենթարկում ժամը 18-ին, երբ Երեւանի ընդհանուր իրավասության դատարանի վարույթում՝ Կարեն Ֆարխոյանի նախագահությամբ, պետք է սկսվեր Գորիս համայնքի Քարահունջ բնակավայրի վարչական ղեկավար Լուսինե Ավետյանի խափանման միջոցի գործով նիստը։ Ավելին՝ մեր ունեցած տեղեկություններով իրավապահները գործարք են առաջարկել Ավետյանին՝ խոստանալով, որ Առուշանյանի դեմ ցուցմունք տալու պարագայում իրեն ազատ կարձակեն։
Փաստաբան Էրիկ Ալեքսանյանը «Փաստինֆո»-ի հետ զրույցում հայտնեց, որ Առուշ Առուշանյանն ընդամենը բերման էր ենթարկվել՝ վկայի կարգավիճակով, սակայն քննիչը փորձել է կասկածանքի շուրջ հարցաքննել։
«Մենք հրաժարվեցինք ցուցմունք տալուց և որևէ հարցի պատասխանելուց՝ որակելով դա որպես նրա նկատմամբ դեռ վաղուց հարուցված քաղաքական հետապնդման շարունակություն»,- նշեց Ալեքսանյանը։
Առուշ Առուշանյանը ՀՔԾ էր բերման ենթարկվել Քարահունջի վարչական ղեկավար Լուսինե Ավետյանի վերաբերյալ քրեական գործով։
«Հետագա գործողությունների և զարգացումների մասին այս պահին կանխատեսումներ չունենք, բայց ենթադրում ենք, որ հետագայում այս հետապնդումը կարող է շարունակվել»,- նշեց փաստաբանը։
Ինչ վերաբերում է Ավետյանի կողմից Առուշանյանի դեմ ցուցմունք տալու վերաբերյալ տեղեկատվությանը, Ալեքսանյանը նշեց, որ իրենք ունեն վկայի կարգավիճակ և նախաքննության գաղտնիությունից ելնելով իրենց որևէ տեղեկատվություն չեն փոխանցել, հետևաբար՝ որևէ տեղեկություն չունի։
